جنگ نیوز ڈیسک
سرینگر، 11 ستمبر: ڈائریکٹر جنرل یوتھ سروسز اینڈ اسپورٹس جموں و کشمیر انورادھا گپتا نے وزیر باغ کے انڈور اسپورٹس کمپلیکس میں بین الاضلاعی یو ٹی سطح کے باکسنگ مقابلوں کا آغاز کیا۔ اس موقع پر ڈپٹی ڈائریکٹر پلاننگ میگھا باوگیا بھی موجود تھیں۔مقابلوں میں جموں و کشمیر کے 14 اضلاع سے تمام عمر کے زمروں کے 279 لڑکے اور 52 تکنیکی عہدیداران شریک ہیں۔ مقابلوں کا پہلا مرحلہ 13 ستمبر 2026 تک جاری رہے گا۔ افتتاح سے قبل انورادھا گپتا نے نوجوان کھلاڑیوں کو منشیات سے دور رہنے کا حلف دلایا۔ یہ مقابلے ’’نشہ مکت جموں و کشمیر ابھیان‘‘ کے تحت منعقد کیے جا رہے ہیں۔ افتتاحی مقابلہ رام بن اور راجوری کے درمیان کھیلا گیا۔ مقابلوں کا مقصد نوجوان باکسرز کو اپنی صلاحیتوں کے اظہار کے ساتھ اعلیٰ سطح کے مقابلوں کا تجربہ فراہم کرنا اور خطے میں کھیلوں کے فروغ کو تقویت دینا ہے۔
