ایران اور امریکہ کے درمیان کشیدگی میں مزید اضافہ دیکھنے میں آیا ہے۔ ایرانی خبر رساں ایجنسی کے مطابق امریکہ نے ایک اہم ریلوے پل کو نشانہ بنایا ہے، جو ایران کو روس اور چین سے ملانے والے ریلوے نیٹ ورک کا حصہ ہے۔ رپورٹ کے مطابق یہ پل ایران، روس اور چین کے درمیان تجارتی سامان کی نقل و حمل کے لیے اہم حیثیت رکھتا ہے۔ ایرانی حکام نے اس حملے کو خطے کے اہم تجارتی اور مواصلاتی ڈھانچے پر حملہ قرار دیتے ہوئے اسے کشیدگی میں ایک نیا اور سنگین مرحلہ قرار دیا ہے۔ کیونکہ اس کے ذریعے خطے کے سب سے بڑے تجارتی اور نقل و حمل کے راستوں میں سے ایک کو نشانہ بنایا گیا ہے۔ایجنسی نے بتایا کہ یہ پل اس بڑے ریلوے نیٹ ورک کا حصہ ہے جو ایران کو ایشیا کے دیگر اہم ممالک سے جوڑتا ہے۔ اس کے ذریعے زمینی راستوں سے مشرق اور مغرب کے درمیان سامان کی نقل و حرکت اور تجارت آسان ہوتی تھی۔ تاہم اس حملے میں ریلوے پل کو کتنا نقصان پہنچا ہے، یا اس میں کوئی جانی نقصان ہوا ہے یا نہیں، اس بارے میں ابھی تک کوئی معلومات سامنے نہیں آئی ہیں۔
امریکی فضائی حملوں میں پاسداران انقلاب کے 3 اہلکاروں کی موت
دریں اثنا ایرانی پاسدارن انقلاب کی بحری فوج نے کہا کہ آج صبح خوزستان صوبہ پر ہوئے امریکی فضائی حملہ میں پاسداران کے 3 اہلکاروں کی موت ہوگئی ہے ۔ بحری فوج نے وارننگ دیتے ہوئے کہا کہ آبنائے ہرمز میں امریکی مہم یا جہاز رانی میں مداخلت کا فیصلہ کن جواب دیا جائے گا، غیر ملکیوں کو آبنائے ہرمز میں کوئی دلچسپی نہیں، امریکہ کی فوجی مہم آبنائے ہرمز کے دوبارہ کھلنے میں رکاوٹ کی وجہ بنے گی۔
