بلال بشیر بٹ
ترواننت پورم/جنگ نیوز/کشمیر سے تعلق رکھنے والے 12 صحافیوں پر مشتمل ایک وفد نے کیرالہ کے دورے کے آخری مرحلے میں CSIR-National Institute for Interdisciplinary Science and Technology (CSIR-NIIST)، واقع انڈسٹریل اسٹیٹ پی او پاپانم کوڈے، ترواننت پورم کا دورہ کیا۔ اس موقع پر ادارے کی انتظامیہ اور سائنسی برادری کی جانب سے وفد کا پرتپاک اور باوقار استقبال کیا گیا۔
دورے کے دوران CSIR-NIIST کے سائنسدانوں کے ساتھ ایک تفصیلی اور بامقصد تبادلۂ خیال ہوا جس کی قیادت ادارے کے ڈائریکٹر ڈاکٹر سی آنندھارام کرشن نے کی۔ انہوں نے CSIR-NIIST کے وژن، قومی سطح پر اس کے کردار اور مختلف سائنسی شعبوں میں جاری بین الشعبہ جاتی تحقیق پر روشنی ڈالی اور بتایا کہ کس طرح تحقیقی نتائج کو سماجی و صنعتی ضروریات سے جوڑا جا رہا ہے۔
کیمیکل سائنسز اینڈ ٹیکنالوجی ڈویژن کے چیف سائنسدان اور سربراہ ڈاکٹر یو ایس ہریش نے ایک جامع پاور پوائنٹ پریزنٹیشن کے ذریعے CSIR-NIIST میں جاری تحقیقی سرگرمیوں، تکنیکی کامیابیوں اور صنعتی اشتراکات کا تفصیلی جائزہ پیش کیا۔ بعد ازاں انہوں نے وفد کو جدید لیبارٹریز کا دورہ بھی کرایا جہاں مختلف شعبوں میں جاری تحقیقی منصوبوں کا عملی مشاہدہ کرایا گیا۔
صحافیوں کو ایگرو اینڈ فوڈ پروسیسنگ ٹیکنالوجی، بایو سائنسز اینڈ بایو انجینئرنگ، کیمیکل سائنسز اینڈ ٹیکنالوجی، آرٹیفیشل انٹیلیجنس، مٹیریلز سائنس اینڈ ٹیکنالوجی اور انوائرمنٹل ٹیکنالوجی کے شعبوں میں CSIR-NIIST کی تحقیق سے تفصیلی طور پر آگاہ کیا گیا۔ خصوصی طور پر بایوڈیگریڈیبل پولی لیکٹک ایسڈ، پائیدار کوائر کمپوزٹس اور ماحول دوست مٹیریلز پر جاری تحقیق نے وفد کی خصوصی توجہ حاصل کی۔
سائنسدانوں نے بتایا کہ یہ تحقیقی اقدامات پائیدار ترقی، سرکلر اکانومی، ماحولیاتی تحفظ اور صنعتی خود کفالت جیسے قومی اہداف سے ہم آہنگ ہیں۔ وفد کو صنعت، اسٹارٹ اپس اور سرکاری اداروں کے ساتھ CSIR-NIIST کے اشتراک اور ٹیکنالوجی ٹرانسفر کے عمل سے بھی آگاہ کیا گیا۔
دورے کا اختتام ایک مفصل سوال و جواب کے سیشن پر ہوا جس میں صحافیوں نے تحقیق کے عملی اطلاق، تجارتی امکانات اور جموں و کشمیر جیسے خطوں میں ان ٹیکنالوجیز کے ممکنہ استعمال پر سوالات کیے۔ یہ دورہ جدید سائنسی تحقیق اور پائیدار ترقی کے باہمی تعلق کو سمجھنے کے لئے نہایت معلوماتی اور بصیرت افروز ثابت ہوا۔
