سری نگر، 24 دسمبر
وزیر اعلیٰ عمر عبداللہ نے بدھ کو کہا کہ آر ڈی ایس ایس کے کامیاب تجربے کے بعد سری نگر کے تقریباً 48 فیصد گھروں کو بلا تعطل بجلی فراہم کی جا رہی ہے۔
وزیر اعلیٰ کے دفتر کے مطابق کے پی ڈی سی ایل نے مزید 83 علاقوں کو 24 گھنٹے بجلی والے زون میں شامل کیا ہے، جس کے بعد شہر کے 108 علاقے مستقل بجلی کی سہولت سے مستفید ہو رہے ہیں، جس سے تقریباً 1.25 لاکھ گھرانے فائدہ اٹھا رہے ہیں۔ اسی طرز پر دیگر اضلاع میں بھی بجلی کے نظام کی بہتری کے لیے اقدامات جاری ہیں۔
عمر عبداللہ نے یاد دلایا کہ پچھلے سال انہوں نے بتایا تھا کہ بجلی کی شکایات بنیادی طور پر اوور لوڈنگ کی وجہ سے آتی ہیں اور مکمل 24×7 بجلی تبھی ممکن ہوگی جب سو فیصد میٹرنگ مکمل ہو جائے۔
وزیر اعلیٰ نے کہا کہ موسم سرما میں عوام کو بہتر سہولیات فراہم کرنے کے لیے مناسب انتظامات کیے گئے ہیں اور برف باری کے بعد سیاحتی سرگرمیوں میں اضافہ متوقع ہے۔ ان کا کہنا تھا کہ حکومت جموں و کشمیر کو سال بھر سیاحتی مرکز بنانے کی کوششیں کر رہی ہے۔
