جنگ نیوز ڈیسک
بھارت اور چین نے، دونوں ملکوں میں نامزد مقامات کو منسلک کرنے والی براہ راست فضائی خدمات کو اکتوبر کے اواخر سے بحال کرنے سے اتفاق کرلیا ہے۔
وزارت خارجہ نے ایک بیان میں کہا کہ دونوں ملکوں کے شہری ہوا بازی کے حکام، براہِ راست فضائی خدمات کو بحال کرنے اور ایک نظرثانی شدہ فضائی خدمات کے سمجھوتے پر تکنیکی سطح کے مذاکرات میں مصروف ہیں۔
یہ مصروفیت اِس سال کے اوائل سے جاری ہے جو کہ بھارت اور چین کے درمیان تعلقات کو بتدریج معمول پر لانے کے سلسلے میں حکومت کے اندازِ نظر کا ایک حصہ ہے۔
انڈیگو کے سی ای او پیٹر ایلبرز نے کہا: "ہم فخر محسوس کرتے ہیں کہ بھارت کے دو شہروں سے چین کے لیے براہِ راست پروازیں دوبارہ شروع کرنے والوں میں شامل ہیں۔ اس سے لوگوں، سامان اور خیالات کی آزادانہ نقل و حرکت ممکن ہوگی اور دنیا کی دو سب سے بڑی آبادیوں اور تیزی سے ترقی کرتی معیشتوں کے درمیان تعلقات مزید مضبوط ہوں گے۔”
انہوں نے مزید کہا کہ مستقبل میں چین کے لیے مزید براہِ راست پروازیں متعارف کرانے پر بھی غور کیا جا رہا ہے۔
کلکتہ اور گوانگژو کے درمیان پروازوں کی بکنگ جمعہ سے شروع ہوگی۔
