ستمبر 9, 2025

جنگ نیوز ڈیسک

سرینگر/جموں کشمیر میں عام آدمی پارٹی کےواحد اسمبلی رکن ڈوڈہ مہراج ملک کو پیر کے روز گرفتار کر کے سخت پبلک سیفٹی ایکٹ (پی ایس اے) کے تحت نظر بند کیا گیا، یہ جموں و کشمیر میں پہلا واقعہ ہے جب کسی موجودہ رکن اسمبلی کو اس قانون کے تحت حراست میں لیا گیا۔
ملک نے گزشتہ برس اسمبلی انتخابات میں بی جے پی امیدوار گجی سنگھ رانا کو 4538 ووٹوں سے شکست دی تھی اور ابتدا میں حکومت سازی کے دوران عمر عبداللہ کی حمایت کی تھی۔
ڈسٹرکٹ مجسٹریٹ ڈوڈہ ہروِندر سنگھ کی جانب سے جاری حکم نامے کے مطابق، مہراج ملک کو پی ایس اے 1978 کے تحت اس بنیاد پر نظر بند کیا گیا کہ ان کی سرگرمیاں "عوامی نظم و نسق کے لیے نقصان دہ” قرار پائی گئیں۔ انتظامیہ کے مطابق، "ایسی سرگرمیوں کا جاری رہنا امن، نظم اور سکون کے لیے سنگین خطرہ تھا”، اس لیے حراست ضروری سمجھی گئی۔
اس گرفتاری پر مختلف سیاسی رہنماؤں نے سخت ردعمل ظاہر کیا۔

"کارروائی میں ہمارا کوئی کردار نہیں”

جموں و کشمیر اسمبلی سیکریٹریٹ نے واضح کیا ہے کہ ایم ایل اے ڈوڈہ مہراج ملک کے خلاف پبلک سیفٹی ایکٹ (پی ایس اے) کی کارروائی میں اس کا کوئی کردار نہیں ہے۔

اسمبلی سیکریٹریٹ کی جانب سے جاری باضابطہ بیان میں کہا گیا:

"کچھ میڈیا رپورٹس اور سوشل میڈیا پلیٹ فارمز پر یہ تاثر دیا جا رہا ہے کہ جموں و کشمیر اسمبلی سیکریٹریٹ نے مہراج ملک پر پی ایس اے عائد کرنے کی منظوری دی ہے، جو کہ سراسر غلط اور بے بنیاد ہے۔ سیکریٹریٹ کا اس معاملے میں کوئی کردار نہیں ہے۔”
مزید کہا گیا کہ اسمبلی سیکریٹریٹ نے محض ضابطہ کار کے رول 260 کے تحت اپنی ذمہ داری نبھاتے ہوئے ارکان اسمبلی کو مہراج ملک کی گرفتاری/نظر بندی کی اطلاع دی۔
وضاحت میں یہ بھی بتایا گیا کہ رول 260 کے مطابق اسپیکر کو کسی رکن کی گرفتاری یا حراست سے متعلق اطلاع ایوان میں پڑھ کر سنانی ہوتی ہے (اگر ایوان اجلاس میں ہو) اور اجلاس نہ ہونے کی صورت میں اسے بلیٹن کے ذریعے اراکین کو آگاہ کیا جاتا ہے۔

وزیر اعلیٰ عمر عبداللہ کا ردعمل
مہراج ملک کو پی ایس اے کے تحت نظر بند کرنے کا کوئی جواز نہیں ہے۔ وہ عوامی سلامتی کے لیے خطرہ نہیں ہیں اور اس متنازعہ قانون کا استعمال کرتے ہوئے ان کی گرفتاری سراسر غلط ہے۔ اگر ایک غیر منتخب حکومت اس طرح منتخب نمائندے کے خلاف اپنے اختیارات استعمال کر سکتی ہے تو پھر کوئی کیسے توقع رکھ سکتا ہے کہ جموں و کشمیر کے عوام جمہوریت پر اعتماد قائم رکھیں گے؟

عام آدمی پارٹی کے بانی اروند کیجریوال کا بیان

"کیا اپنے حلقے کی عوام کے لیے اسپتال کا مطالبہ کرنا اتنا بڑا جرم ہے کہ ایک منتخب ایم ایل اے کو اس کے لیے جیل میں ڈال دیا جائے؟

مہراج ملک عام آدمی پارٹی کے شیر ہیں۔ وہ ہمیشہ عوام کی آواز بن کر حق کی لڑائی لڑتے رہیں گے۔ جیل، دھمکیاں اور سازشیں… یہ سب عام آدمی پارٹی کے کسی بھی سپاہی کو کبھی خوف زدہ نہیں کر سکتیں۔”

عام آدمی پارٹی ترجمان مدثر حسن کی سرینگر میں پریس کانفرنسسری نگر/عام آدمی پارٹی جموں و کشمیر نے اپنے صدرِ ریاست و ایم ایل اے ڈوڈہ، مہراج ملک کی گرفتاری کی شدید مذمت کی ہے۔ پارٹی نے الزام لگایا کہ ان پر ایف آئی آر درج کر کے پی ایس اے عائد کرنے کی تیاریاں کی جا رہی ہیں جو عوامی آواز کو دبانے کی کوشش ہے۔
پارٹی ترجمان مدثر حسن نے پریس کانفرنس میں کہا کہ یہ غیر جمہوری اقدام عوامی جذبات کے خلاف ہے۔ انہوں نے انتظامیہ سے مطالبہ کیا کہ فوری طور پر ایف آئی آر واپس لی جائے، مہراج ملک کو رہا کیا جائے اور عوامی مسائل اجاگر کرنے والے لیڈران کو ڈرانا دھمکانا بند کیا جائے۔