جنگ نیوز
پلولامہ/ کشمیر میں اس سال بادام کی فصل معمول سے تقریباً 20 دن پہلے تیار ہو گئی، جس پر کسانوں نے موسمیاتی تبدیلی کو ذمہ دار ٹھہراتے ہوئے مستقبل کے حوالے سے تشویش ظاہر کی ہے۔ پلوامہ اور بڈگام کے کریوا علاقے بادام کی پیداوار کے اہم مراکز ہیں، جہاں ہزاروں کسان اس شعبے سے وابستہ ہیں۔
کاشتکاروں کا کہنا ہے کہ بڑھتے ہوئے درجۂ حرارت، خشک موسم اور بے وقت بارشوں کے باعث بادام جلد پک گئے، جبکہ کئی باغات میں پتوں کے قبل از وقت جھڑنے سے بھی خدشات پیدا ہوئے ہیں۔ تاہم، اس سال پیداوار گزشتہ برسوں کے مقابلے میں بہتر رہی ہے۔
محکمۂ باغبانی نے بھی موسم میں تبدیلی کو تسلیم کرتے ہوئے کہا کہ اس سال فصل اطمینان بخش رہی ہے اور موسمیاتی تبدیلی سے ہم آہنگ بادام کی نئی اقسام متعارف کرائی جا رہی ہیں۔ ماہرین نے جدید باغبانی، بہتر آبپاشی اور موسمیاتی تبدیلی کے مطابق زرعی طریقوں کو فروغ دینے پر زور دیا ہے تاکہ اس صنعت کو مستقبل میں محفوظ رکھا جا سکے۔
