جنگ نیوز ڈیسک
عید میلاد النبی ﷺ حضرت محمد مصطفیٰ ﷺ کی ولادت باسعادت کا دن آج کشمیر میں نہایت عقیدت و احترام کے ساتھ منایا جا رہا ہے۔ اس موقع پر میلاد محفلیں اور سیرت کانفرنسیں منعقد ہوں گی جن میں علماء سیرت نبوی ﷺ اور آپؐ کی تعلیمات پر روشنی ڈالیں گے۔
سب سے بڑا اجتماع درگاہ حضرتبل سری نگر میں منعقد ہوگا، جہاں پیغمبر اسلام ﷺ کا موئے مبارک محفوظ ہے۔ اس پرنور موقع پر ہزاروں عقیدت مند شرکت کر کے دعا و عبادت میں مشغول ہوں گے۔
اس برس کی عید میلاد النبی ﷺ غیر معمولی تاریخی اہمیت رکھتی ہے کیونکہ اسلامی تقویم کے مطابق یہ پیغمبر اسلام ﷺ کی 1500 ویں سالگرہ ہے۔ آپؐ 12 ربیع الاول کو مکہ مکرمہ میں پیدا ہوئے اور آپؐ کی تعلیمات تا قیامت بنی نوع انسان کے لیے رہنمائی کا سرچشمہ ہیں۔
