جیلانی کامران
سوپور/جنگ نیوز/ سول سوسائٹی سوپور رجسٹرڈ کے زیرِ اہتمام نیو ریور ایج ہوٹل سوپور میں امدادِ خانہ آبادی برائے مستحق و یتیم بچیاں کے عنوان سے ایک پروقار تقریب کا انعقاد کیا گیا۔
تقریب کے دوران امدادِ خانہ آبادی کے جذبے کے تحت پانچ مستحق لڑکیوں کو موقع پر ہی امدادی کِٹس، جن میں چیک بھی شامل تھے، انتہائی رازداری اور وقار کے ساتھ فراہم کئے گئے۔اس موقع پر سوسائٹی کے سرپرستِ اعلیٰ حشمت اللہ ہاشمی نے کہا کہ مستحق اور غریب خاندانوں کی بیٹیوں کی کفالت کیلئے اجتماعی طور پر کام کرنے کی اشد ضرورت ہے۔
انہوں نے کہا کہ امدادِ خانہ آبادی جیسے فلاحی اقدامات کو مزید وسعت دینے کیلئے معاشرے کے صاحبِ استطاعت افراد کو آگے آنا چاہیے۔معروف قلمکار رشید پروین نے کہا کہ نوجوانوں کو آگے بڑھ کر فلاح و بہبود کے کاموں میں اپنا کلیدی کردار ادا کرنا چاہیے اور معاشرے کے تئیں اپنی ذمہ داریاں احسن انداز میں نبھانی چاہئیں۔
تقریب کے اختتام پر تحریکِ شکرانہ پیش کرتے ہوئے سول سوسائٹی سوپور رجسٹرڈ کے چیئرمین بشیر احمد بٹ نے کہا کہ سول سوسائٹی سوپور رجسٹرڈایک غیر سیاسی پلیٹ فارم ہے اور اس کا بنیادی مقصد مفلوک الحال اور مستحق افراد کی حتی الامکان مدد کرنا ہے۔
تقریب کے آغاز میں پیرزادہ حافظ و مولانا ریاض احمد قاسمی نے تلاوتِ کلامِ پاک کی سعادت حاصل کی، جبکہ عبدالرشید بدرو نے بارگاہِ رسالت مآب ﷺ میں نعت پیش کی۔اس موقعہ پر زندگی کے مختلف شعبہ ہائے فکر سے وابستہ افراد نے شرکت کی اور سول سوسائٹی سوپور رجسٹرڈ کی جانب سے مستحق بیٹیوں کی معاونت کے اس اقدام کو سراہتے ہوئے اسے ایک قابلِ قدر فلاحی کاوش قرار دیا۔
