جنگ نیوز
سری نگر/: سروس سلیکشن بورڈ کی جانب سے کلاس چہارم کی 2800 آسامیوں کے اشتہار کے بعد تعلیم یافتہ بے روزگار نوجوانوں نے بھرتی کے لئے مقرر زیادہ سے زیادہ تعلیمی اہلیت کی شرط ختم کرنے کا مطالبہ تیز کردیا ہے۔
2008 میں غلام نبی آزاد کی قیادت والی پی ڈی پی-کانگریس حکومت کے دور میں ایس آر او 99 کے تحت کلاس چہارم کی براہ راست بھرتی کے لئے کم از کم اہلیت میٹرک اور زیادہ سے زیادہ 10+2 مقرر کی گئی تھی۔ 2020 میں جاری خصوصی بھرتی کے قواعد میں بھی یہی شرط برقرار رکھی گئی۔
موجودہ ضابطے کے باعث گریجویشن یا اس سے زیادہ تعلیمی قابلیت رکھنے والے امیدوار کلاس چہارم کی ان آسامیوں کے لئے درخواست دینے کے اہل نہیں ہیں، جس سے ہزاروں تعلیم یافتہ نوجوان مواقع سے محروم رہتے ہیں۔
سرکاری اعداد و شمار کے مطابق جموں و کشمیر کے کالجوں اور جامعات سے ہر سال 25 ہزار سے زائد طلبہ فارغ التحصیل ہوتے ہیں، جبکہ ہزاروں نوجوان پوسٹ گریجویٹ، پیشہ ورانہ اور تکنیکی تعلیم بھی مکمل کرتے ہیں۔
گزشتہ سال اسمبلی میں پیش کیے گئے اعداد و شمار کے مطابق رجسٹرڈ بے روزگار نوجوانوں میں تقریباً ایک تہائی گریجویٹ اور پوسٹ گریجویٹ ہیں، جن میں 66628 گریجویٹ اور 47114 پوسٹ گریجویٹ شامل ہیں۔
دریں اثنا، لداخ میں حال ہی میں کلاس چہارم کی آسامیوں کے لئے زیادہ سے زیادہ تعلیمی اہلیت کی شرط ختم کردی گئی ہے، جس کے بعد جموں و کشمیر میں بھی مذکورہ پابندی ختم کرنے کا مطالبہ مزید زور پکڑ گیا ہے۔
