سرینگر:
جموں و کشمیر میں اگلے پانچ دنوں کے دوران وقتاً فوقتاً بارشوں کا امکان ہے۔ بھارت کے محکمہ موسمیات (IMD) نے یونین ٹیریٹری کے اکثر علاقوں میں ہلکی سے درمیانی بارش کی پیشگوئی کی ہے اور حساس علاقوں میں فلیش فلڈ (اچانک سیلابی صورتحال)، لینڈ سلائیڈنگ (تودے گرنے) اور گرجمک کے ساتھ بارش کا الرٹ جاری کیا ہے۔
محکمہ موسمیات سرینگر کے مطابق، 2 اگست سے 6 اگست کے دوران وادیِ کشمیر میں ہلکی سے درمیانی بارش کی توقع ہے، جبکہ جموں ڈویژن کے بھی کئی علاقوں میں اس دوران درمیانی درجے کی بارشیں ہو سکتی ہیں۔ 2 اور 3 اگست کو کشمیر اور جموں ریجن کے بعض الگ تھلگ مقامات پر بھاری بارش کا امکان ہے، جس کے بعد 4 اگست سے بارش کے زور میں کمی آئے گی۔
محکمہ موسمیات نے اگلے دو دنوں کے دوران چند مقامات پر 40 سے 50 کلومیٹر فی گھنٹہ کی رفتار سے تیز ہواؤں، بجلی چمکنے اور گرجمک کا اندیشہ ظاہر کیا ہے۔ اس کے علاوہ خبردار کیا گیا ہے کہ شدید بارشوں کے باعث اگلے پانچ دنوں میں حساس علاقوں میں فلیش فلڈ، لینڈ سلائیڈنگ، مٹی کے تودے گرنے اور پہاڑوں سے پتھر گرنے کے واقعات پیش آ سکتے ہیں۔
