جنگ نیوز
سری نگر/بڈگام: میرواعظِ کشمیر ڈاکٹر مولوی محمد عمر فاروق نے بڈگام میں منعقدہ تعزیتی اجتماع سے خطاب کرتے ہوئے مرحوم آیت اللہ سید علی خامنہ ای کو خراجِ عقیدت پیش کیا اور انہیں عالمِ اسلام کی ایک عظیم دینی و سیاسی شخصیت قرار دیا۔
انہوں نے کہا کہ آیت اللہ خامنہ ای کی زندگی ایمان، استقامت، ظلم و ناانصافی کے خلاف جدوجہد اور امتِ مسلمہ کے اتحاد کے پیغام سے عبارت تھی۔ میرواعظ نے کہا کہ مرحوم رہنما کے لئے سب سے بڑا خراجِ عقیدت یہی ہے کہ مسلمان باہمی اتحاد کو مضبوط کریں، کیونکہ شیعہ اور سنی ایک ہی امت کا حصہ ہیں۔
میرواعظ نے کہا کہ آیت اللہ خامنہ ای نے دباؤ کے باوجود جوہری ہتھیاروں کی مخالفت کی اور انہیں اسلامی تعلیمات کے منافی قرار دیا۔ انہوں نے فلسطینی عوام کے حقوق، آزادی اور انصاف کی مسلسل حمایت کو بھی مرحوم رہنما کی نمایاں خدمات میں شمار کیا۔
خطاب کے اختتام پر میرواعظ نے مرحوم آیت اللہ خامنہ ای کے لئے دعائے مغفرت کرتے ہوئے کہا کہ ان کی زندگی مسلمانوں کو اتحاد، بھائی چارے، مظلوموں کی حمایت اور انصاف و امن کے لئے جدوجہد کا درس دیتی رہے گی۔
