جنگ نیوز ڈیسک
جنرل دھیرج سیٹھ نے منگل کو بھارتی فوج کے 31ویں چیف آف آرمی اسٹاف (COAS) کی حیثیت سے عہدہ سنبھال لیا۔ انہوں نے جنرل اوپیندر دویدی کی جگہ لی، جو چار دہائیوں سے زائد فوجی خدمات انجام دینے کے بعد سبکدوش ہو گئے۔
1986 میں آرمرڈ کور میں کمیشن حاصل کرنے والے جنرل دھیرج سیٹھ اس سے قبل وائس چیف آف آرمی اسٹاف تھے۔ انہوں نے ساؤتھ ویسٹرن کمانڈ، سدرن کمانڈ، سدرشن چکر کور، دہلی ایریا، مغربی محاذ اور جموں و کشمیر میں مختلف اہم عسکری ذمہ داریاں نبھائی ہیں۔
وزارت دفاع کے مطابق جنرل سیٹھ فوج کی جدید کاری، خود انحصاری، انسدادِ دہشت گردی اور دفاعی منصوبہ بندی میں وسیع تجربہ رکھتے ہیں۔ حکام کا کہنا ہے کہ ان کی قیادت میں فوج مستقبل کے سیکورٹی چیلنجز سے نمٹنے اور جدید ٹیکنالوجی سے لیس دفاعی صلاحیتوں کو مزید مضبوط بنانے پر توجہ دے گی۔
جنرل دھیرج سیٹھ نیشنل ڈیفنس اکیڈمی (NDA) اور نیشنل ڈیفنس کالج کے فارغ التحصیل ہیں، جبکہ انہوں نے فرانس کے شہر پیرس میں منعقدہ ممتاز کمانڈ اینڈ اسٹاف کورس میں بھی شرکت کی ہے۔ انہیں فوجی منصوبہ بندی، فورس مینجمنٹ، جدید جنگی حکمت عملی اور دفاعی صلاحیتوں کی ترقی کے شعبوں میں وسیع تجربہ حاصل ہے، جس کے پیش نظر ان کی تقرری کو بھارتی فوج کی جدید کاری اور آپریشنل استعداد کو مزید مضبوط بنانے کی سمت ایک اہم قدم قرار دیا جا رہا ہے۔
