محکمہ فلوریکلچر کشمیر نے سوچھ بھارت مشن کے "ریڈیوس، ری یوز، ری سائیکل” (3R) تصور کے تحت لال چوک کے پولو گراؤنڈ پارک میں ایک ماحول دوست تھیم پر مبنی باغ قائم کیا ہے۔
ڈائریکٹر فلوریکلچرمعصومہ بانو نے بتایا کہ باغ میں محکمہ کے باغات میں موجود ناکارہ سامان، پرانے کشمیری دان، لکڑی کے ڈھانچوں اور روایتی اشیا کو تخلیقی انداز میں گملوں اور آرائشی تنصیبات میں تبدیل کیا گیا ہے۔
انہوں نے کہا کہ اس منصوبے کا مقصد ماحولیاتی شعور بیدار کرنے کے ساتھ ساتھ سیاحوں اور مقامی لوگوں کے لیے ایک نئی کشش پیدا کرنا ہے۔ باغ میں رنگ برنگے پھول اور آرائشی پودے بھی لگائے جا رہے ہیں تاکہ اس کی خوبصورتی مزید بڑھائی جا سکے۔
ان کے مطابق یہ اقدام پائیدار ترقی، سیاحت کے فروغ اور کشمیر کی ثقافتی شناخت کو اجاگر کرنے کی ایک مشترکہ کوشش ہے، جسے عوام کی جانب سے کافی سراہا جا رہا ہے۔
