جنگ نیوز ڈیسک
سرینگر، 6 جون: اسلامک گلوبل اسکول (IGS) پادشاہی باغ سرینگر نے انٹر اسکول سائیکلنگ چیمپئن شپ 2026 کا کامیاب انعقاد کیا، جس میں ضلع سرینگر کے مختلف تعلیمی اداروں کے طلبہ نے حصہ لیا۔ مقابلے کا آغاز ڈل گیٹ سے ہوا جبکہ اختتامی تقریب اور انعامات کی تقسیم نگین پارک میں منعقد ہوئی۔
تقریب میں پرائیویٹ اسکولز ایسوسی ایشن جموں و کشمیر کے سرپرست ڈاکٹر جی این وار، صدر بلال احمد بھٹ، ضلع صدر عادل حبیب، ضلع سرینگر سائیکلنگ ایسوسی ایشن کے صدر مشتاق احمد، پرنسپل عروج قادری اور دیگر معزز شخصیات نے شرکت کی۔
ڈاکٹر جی این وار نے اس موقع پر اسکول انتظامیہ اور شعبۂ تربیتِ بدنی کی کاوشوں کو سراہتے ہوئے کہا کہ ایسے مقابلے طلبہ میں جسمانی صحت، نظم و ضبط اور مثبت مسابقتی جذبے کو فروغ دیتے ہیں۔
مقابلے میں اسلامک گلوبل اسکول سمیت سرینگر کے متعدد معروف اسکولوں اور فلائنگ مشین سائیکلنگ کلب نے شرکت کی۔ شرکاء کی حفاظت اور مساوی مواقع کو یقینی بنانے کے لیے مخصوص ضابطوں کے تحت صرف ایم ٹی بی اور رینجر طرز کی سائیکلوں کے استعمال کی اجازت دی گئی۔
اختتامی تقریب میں نمایاں کارکردگی دکھانے والے طلبہ کو تمغے، اسناد اور انعامات سے نوازا گیا۔ پرنسپل عروج قادری نے تمام شریک اداروں، اساتذہ، والدین اور رضاکاروں کا شکریہ ادا کرتے ہوئے کہا کہ اس پروگرام کا مقصد طلبہ کو صحت مند اور تعمیری سرگرمیوں کی طرف راغب کرنا اور انہیں منشیات اور موبائل فون کے غیر ضروری استعمال جیسی مضر عادات سے دور رکھنا ہے۔
