پونچھ
7 جون: پونچھ ضلع کی تحصیل سورنکوٹ کے بفلیاز علاقے میں ہفتہ کی صبح ایک خوفناک آگ لگ گئی، جس سے 13 دکانیں جل کر خاکستر ہوگئیں۔ پولیس کے مطابق آگ ایک دکان میں بجلی کے شارٹ سرکٹ کی وجہ سے لگی اور تیزی سے مارکیٹ میں پھیل گئی اور 13 دکانوں کو اپنی لپیٹ میں لے لیا۔ اگرچہ مقامی باشندوں، فوج کے اہلکاروں، پولیس اور فائر اینڈ ایمرجنسی سروسز کے عملے نے آگ پر قابو پانے کی کوششیں کیں لیکن آگ اتنی شدید تھی کہ اس نے دکانوں کو مکمل طور پر تباہ کردیا۔
مقامی لوگوں نے الزام لگایا کہ فائر اینڈ ایمرجنسی سروسز کی گاڑی دیر سے موقع پر پہنچی جس کے نتیجے میں دکانوں کے مالکان کو کروڑوں روپے کا نقصان پہنچا۔ ایس ایچ او سورنکوٹ سید عابد بخاری نے بتایا کہ ہولناک آتشزدگی کے واقعے میں 13 دکانیں مکمل طور پر جل گئیں۔ انہوں نے مزید کہا کہ ابتدائی تحقیقات سے پتہ چلتا ہے کہ آگ شارٹ سرکٹ کے باعث لگی۔ انہوں نے مزید کہا کہ انتظامیہ متاثرہ خاندانوں کے ساتھ کھڑی ہے اور ان کی ہر ممکن مدد کی جائے گی۔
