جنگ نیوز ڈیسک
رنجی ٹرافی میں تاریخی کامیابی کے بعد جموں و کشمیر کرکٹ ٹیم کے کھلاڑیوں نے آئی سی سی چیئرمین جے شاہ سے ملاقات کی اور اپنی خوشی ان کے ساتھ شیئر کی۔ ٹیم نے گزشتہ ہفتے ہبلی کرکٹ گراؤنڈ میں آٹھ مرتبہ کی چیمپئن کرناٹک کو شکست دے کر پہلی بار رنجی ٹرافی جیتی۔
کھلاڑیوں نے اس موقع پر بی سی سی آئی کے سیکریٹری کے طور پر جے شاہ کے دور میں جموں و کشمیر میں کرکٹ کے ڈھانچے اور مواقع کو مضبوط بنانے میں ان کے کردار کو سراہا۔ جے شاہ نے ٹیم کو تاریخی کامیابی پر مبارکباد دیتے ہوئے ان کی حوصلہ افزائی کی۔
بی سی سی آئی نے بھی ٹیم اور کرکٹ برادری کو مبارکباد پیش کرتے ہوئے کہا کہ جموں و کشمیر کی یہ جیت ہندوستانی ڈومیسٹک کرکٹ میں ایک یادگار باب ہے۔
ٹیم کی کامیابی میں آل راؤنڈر عبدالصمد اور نوجوان فاسٹ بولر عاقب نبی کی کارکردگی نمایاں رہی۔ عاقب نبی نے ٹورنامنٹ میں 60 وکٹیں حاصل کیں جبکہ عبدالصمد نے 700 سے زائد رنز اسکور کیے۔ ماہرین کے مطابق یہ تاریخی کامیابی جموں و کشمیر میں نوجوان کرکٹرز کے لیے بڑی تحریک ثابت ہوگی۔
