جنگ نیوز
سرینگر/جے اینڈ کے بینک نے ممبئی میں منعقدہ نوابھارت بی ایف ایس آئی سمٹ و ایوارڈز 2026 میں بینکاری کے شعبے میں ڈیجیٹل تبدیلی کے لئے بیسٹ بینک ایوارڈ حاصل کیا ہے۔
تقریب کے دوران بینک کی جانب سے زونل ہیڈ ممبئی عرفان کاووسہ نے یہ اعزاز حاصل کیا۔ تقریب تاج پریذیڈنٹ، کَف پریڈ، ممبئی میں منعقد ہوئی۔
بینک کے منیجنگ ڈائریکٹر اور چیف ایگزیکٹو آفیسر امیتاوا چٹرجی نے اس کامیابی کو جے اینڈ کے بینک کے تمام ملازمین کی مشترکہ کاوش قرار دیتے ہوئے کہا کہ ڈیجیٹل تبدیلی کا مقصد بینکاری کو آسان، قابلِ رسائی اور صارفین کے لئے محفوظ و قابلِ اعتماد بنانا ہے۔
انہوں نے کہا کہ بینک جدید ٹیکنالوجی، اعداد و شمار پر مبنی سہولیات اور محفوظ ڈیجیٹل نظام کے ذریعے صارفین کو بہتر خدمات فراہم کرنے کے لئے مسلسل اقدامات کر رہا ہے، جبکہ صارفین کا اعتماد اور معلومات کا تحفظ اس سفر کا بنیادی حصہ ہیں۔
نوابھارت بی ایف ایس آئی سمٹ میں بینکاری، مالیاتی خدمات، بیمہ اور مالیاتی ٹیکنالوجی کے ماہرین نے شرکت کی، جہاں ڈیجیٹل تبدیلی، مصنوعی ذہانت، ڈیجیٹل خدمات، مالیاتی ٹیکنالوجی اور مالیاتی خطرات سے نمٹنے سمیت مختلف امور پر تبادلہ خیال کیا گیا۔
