جنگ نیوز ڈیسک
سری نگر/سری نگر میونسپل کارپوریشن SMC نے شہریوں کے لئے 24 گھنٹے آن لائن کچرا دان بکنگ کی سہولت شروع کردی ہے، جس کے تحت شادی بیاہ، تعزیتی اجتماعات اور دیگر تقریبات کے لئے کچرا دان حاصل کرنے کی خاطر دفاتر جانے کی ضرورت نہیں ہوگی۔
یہ سہولت SMC کے کمشنر فضل الحق حسیب اور جوائنٹ کمشنر سہیل الاسلام نے شروع کی۔ شہری سرکاری ویب سائٹ پر اپنی ضرورت، مقام اور رابطے کی تفصیلات درج کرکے آن لائن ادائیگی کے ذریعے بکنگ کرسکیں گے۔ بکنگ کی تصدیق کے ساتھ متعلقہ ڈرائیور کا نام اور فون نمبر بھی فراہم کیا جائے گا۔
فضل الحق حسیب کے مطابق کچرا دان کا یومیہ کرایہ 2000 روپے ہے اور ایک دن کی بکنگ صبح 10 بجے سے اگلے روز 10 بجے تک ہوگی۔ اضافی دن بھی بک کیے جاسکتے ہیں۔
کمشنر نے کہا کہ اس نظام سے شہری خدمات میں آسانی اور شفافیت آئے گی۔ انہوں نے بتایا کہ ٹھوس فضلے کے انتظام، تعمیراتی و انہدامی فضلے کی تلفی اور بایومائننگ سمیت متعدد منصوبوں پر بھی کام جاری ہے۔
انہوں نے مزید کہا کہ SMC نے کمیونٹی ہالوں کا جائزہ بھی شروع کیا ہے۔ اب تک تقریباً 25 ہالوں کا معائنہ مکمل ہوچکا ہے، جبکہ باقی ہالوں کے جائزے کے بعد ضروری مرمت اور بہتری کے کام کیے جائیں گے۔
