سری نگر، 22 اگست:
سری نگر کے بیرونی علاقے باغِ مہتاب میں ہفتے کی صبح آتشزدگی کے ایک واقعے میں ایک ڈیپارٹمنٹل اسٹور جل کر خاکستر ہو گیا۔
اطلاعات کے مطابق صبح کے اوقات میں باغِ مہتاب میں واقع ‘بلومز ڈیپارٹمنٹل اسٹور’ میں اچانک آگ بھڑک اٹھی، جس نے دیکھتے ہی دیکھتے پوری عمارت کو اپنی لپیٹ میں لے لیا۔
مقامی لوگوں نے آگ کے شعلے اٹھتے دیکھے اور فوری طور پر فائر اینڈ ایمرجنسی سروسز کو اطلاع دی۔
رنگریٹ اور راولپورہ سے فائر برگیڈ کی گاڑیاں فوری طور پر جائے وقوعہ پر پہنچیں اور کڑی مشقت کے بعد آگ پر قابو پا لیا۔ فائر فائٹرز کی بروقت کارروائی سے آگ کو آس پاس کی عمارتوں تک پھیلنے سے روک دیا گیا۔
اس واقعے میں کسی کے زخمی ہونے کی کوئی اطلاع نہیں ہے، جبکہ آگ لگنے کی وجہ اور نقصان کے تخمینے کا پتہ لگایا جا رہا ہے۔
