جنگ نیوز ڈیسک
ڈیموکریٹ زوہران ممدانی نے نیویارک سٹی کے میئر کا انتخاب جیت کر تاریخ رقم کر دی۔ وہ امریکا کے سب سے بڑے اور اہم مالیاتی مرکز نیویارک سٹی کے پہلے مسلم، پہلے بھارتی نژاد اور پہلے افریقی نژاد میئر بن گئے ہیں۔
34 سالہ زوہران ممدانی کی یہ جیت ایک غیر معمولی سیاسی ابھار سمجھی جا رہی ہے۔ ان کی محنت کش طبقے سے جڑی مہم اور پرکشش شخصیت نے شہر کے پانچوں بورو کے ووٹروں کو متحرک کیا۔ ابتدائی نتائج کے مطابق، ممدانی نے سابق گورنر اینڈریو کومو کو دوسری بار شکست دی، جب کہ ریپبلکن امیدوار کرٹس سلوا خاصے پیچھے رہے۔
یکم جنوری کو حلف اٹھانے کے بعد ممدانی نیویارک کے گزشتہ ایک صدی میں سب سے کم عمر میئر ہوں گے۔ اس الیکشن میں دو ملین سے زائد ووٹ ڈالے گئے، جو 1969 کے بعد سب سے زیادہ ووٹ ڈالنے کی شرح ہے۔
مہم کے دوران ممدانی کو ریپبلکنز، خصوصاً ڈونلڈ ٹرمپ کی جانب سے سخت تنقید کا سامنا رہا، جنہوں نے انہیں “کمیونسٹ” قرار دیتے ہوئے وفاقی فنڈز روکنے کی دھمکی دی۔ تاہم ممدانی، جو 2018 سے امریکی شہری ہیں، نے تمام حملوں کا مقابلہ پُرعزم انداز میں کیا۔
یوگنڈا میں فلم ساز میرا نائر اور ماہرِ تعلیم محمود ممدانی کے گھر پیدا ہونے والے زوہران بچپن میں نیویارک منتقل ہوئے اور کوئنز میں پلے بڑھے۔
سیاسی مبصرین کے مطابق، ممدانی کی جیت نیویارک کی بدلتی ہوئی سیاسی ترجیحات اور قیادت میں تنوع کے فروغ کی علامت ہے۔ یہ کامیابی ڈیموکریٹک پارٹی کے ترقی پسند دھڑے کے لیے ایک نئی توانائی کا اشارہ بھی سمجھی جا رہی ہے۔
