جنگ نیوز ڈیسک
سرینگر، 3 اکتوبر: عوامی اتحاد پارٹی (AIP) نے حکومت سے تدریسی عملے کی 18601 خالی آسامیوں کو فوری طور پر پُر کرنے کا مطالبہ کرتے ہوئے کہا ہے کہ اساتذہ کی کمی طلبہ کے تعلیمی مستقبل کے لئے تشویش کا باعث ہے۔
پارٹی کے چیف ترجمان عنایت النبی نے کہا کہ اساتذہ تعلیمی نظام کی بنیاد ہیں اور ان کی طویل عرصے تک خالی آسامیاں معمولی انتظامی کوتاہی نہیں سمجھی جاسکتیں۔
اسمبلی میں پیش کردہ سرکاری اعداد و شمار کے مطابق خالی آسامیوں میں 10268 ٹیچر، 5278 ماسٹر، 2154 لیکچرار، 633 ہیڈماسٹر اور 268 پرنسپل کی آسامیاں شامل ہیں۔
کشمیر ڈویژن میں 2115 ٹیچر اور 2463 ماسٹر کی آسامیاں خالی ہیں، جبکہ اننت ناگ میں 1016، بڈگام میں 797، پلوامہ میں 764 اور کپواڑہ میں 621 ٹیچر کی آسامیاں خالی ہیں۔
عنایت النبی نے ڈی فریزنگ کے لئے نشان زد 5367 جنرل لائن ٹیچر آسامیوں پر فوری کارروائی اور بھرتی کے تمام مراحل کے لئے واضح مدت مقرر کرنے کا مطالبہ کیا۔
انہوں نے کہا کہ اساتذہ کی کمی دور کرنے کے لئے اسکول اور مضمون وار منصوبہ بندی ضروری ہے، کیونکہ یہ معاملہ محض روزگار نہیں بلکہ بچوں کی تعلیم اور جموں و کشمیر کے مستقبل سے وابستہ ہے۔
