جنگ نیوز ڈیسک
تہران/ایران کے سپریم لیڈر مجتبیٰ خامنہ ای کے ایک مشیر نے خبردار کیا ہے کہ اگر امریکہ نے دوبارہ حملہ کیا تو تہران مغربی ایشیا میں جاری تنازع کو بحیرۂ ہند تک پھیلا سکتا ہے۔
یمن کے حوثیوں کی جانب سے بحیرۂ احمر کے ساحلی علاقے پر کنٹرول مضبوط کیے جانے کے بعد اہم باب المندب آبنائے پر بھی دباؤ بڑھ گیا ہے، جو نہر سویز کے ذریعے ایشیا اور یورپ کو ملاتی ہے۔
ایران نے ایرانی ساحل کے قریب آبنائے ہرمز میں بھی آمدورفت محدود کردی ہے۔ ایرانی حکام اس سے قبل بھی امریکی حملوں کی صورت میں تنازع کا جغرافیائی دائرہ وسیع کرنے کا انتباہ دے چکے ہیں۔
ایرانی سپریم لیڈر کے مشیر کی جانب سے جمعرات کو بحیرۂ ہند کا واضح طور پر ذکر پہلی مرتبہ سامنے آیا ہے۔ بحر ہند میں ایران سے تقریباً 4000 کلومیٹر دور برطانوی-امریکی فوجی اڈہ ڈیگو گارسیا واقع ہے۔
