سرینگر:
جنگ نیوز ڈیسک
لداخ میں طویل عرصے سے جاری مطالبات کی تحریک کے درمیان ایک اہم پیش رفت سامنے آئی ہے۔ کرگل سے لہہ تک مجوزہ 15 روزہ ’’امن و انصاف پدیاترا‘‘ کو 9 ستمبر کو نئی دہلی میں وزارتِ داخلہ کے نمائندوں اور لداخ کے وفد کے درمیان ہونے والی تازہ بات چیت کے پیش نظر مؤخر کر دیا گیا ہے۔
لیہہ ایپکس باڈی کے رکن اور سماجی کارکن سونم وانگچک نے بتایا کہ پدیاترا کو ملتوی کرنے کا فیصلہ آئندہ مذاکرات سے وابستہ امیدوں کے پیش نظر کیا گیا ہے۔ ان کے مطابق اگر مذاکرات میں لداخ کے دیرینہ مطالبات پر ٹھوس پیش رفت ہوتی ہے تو مارچ کی ضرورت نہیں رہے گی، تاہم بات چیت ایک بار پھر تاخیر یا ’’ٹال مٹول‘‘ کا شکار ہوئی تو پدیاترا دوبارہ شروع کی جائے گی۔
یہ پدیاترا 10 ستمبر کو کرگل سے شروع ہو کر 24 ستمبر کو لہہ میں اختتام پذیر ہونے والی تھی۔ اس کا مقصد لداخ کے لیے ریاستی حیثیت، آئین کے چھٹے شیڈول کے تحت تحفظات اور دیگر مطالبات کو اجاگر کرنا تھا۔
منتظمین کا کہنا ہے کہ اگر احتجاج دوبارہ شروع کیا گیا تو اس کی شکل میں تبدیلی بھی ممکن ہے اور طویل فاصلے کی پدیاترا کے بجائے مختصر مارچ کا راستہ اختیار کیا جا سکتا ہے۔ اب تمام نظریں 9 ستمبر کی نئی دہلی میٹنگ پر مرکوز ہیں، جس کے نتائج طے کریں گے کہ لداخ کی سڑکوں پر احتجاج مستقل طور پر رکتا ہے یا ایک نئے انداز میں دوبارہ شروع ہوتا ہے۔
