بلال بشیر بٹ
جنگ نیوز
سرینگر/سرینگر بدھ کو ایک بڑی سیاسی کشمکش کا مرکز بننے جا رہا ہے، جہاں برسرِ اقتدار نیشنل کانفرنس (NC) اور اپوزیشن بھارتیہ جنتا پارٹی (BJP) الگ الگ احتجاجی پروگراموں کے ساتھ میدان میں اتریں گی۔
BJP نے بجلی نرخوں میں اضافے، بے روزگاری، مبینہ بدعنوانی اور سرکاری ملازمتوں کی آؤٹ سورسنگ کے خلاف لال چوک سے سول سیکریٹریٹ تک مارچ کا اعلان کیا ہے، جس کی قیادت پارٹی کے جموں و کشمیر صدر اور راجیہ سبھا رکن ست شرما اور اسمبلی میں قائد حزب اختلاف سنیل شرما کریں گے۔
دوسری جانب NC نے BJP کے احتجاج کے جواب میں سرینگر اور جموں میں احتجاج کا اعلان کرتے ہوئے ریاستی درجہ کی بحالی، آئینی ضمانتوں، ریزرویشن فائل کی منظوری اور جموں و کشمیر کے عوام کے لئے انصاف کا مطالبہ کیا ہے۔
NC کارکن گنڈون پارک راجباغ میں جمع ہوں گے، جہاں سے پارٹی اپنے احتجاجی پروگرام کا آغاز کرے گی۔
دونوں بڑی سیاسی جماعتوں کے ایک ہی روز سڑکوں پر اترنے کے اعلان نے سرینگر کی سیاسی فضا کو گرم کر دیا ہے، جبکہ اسمبلی اجلاس سے قبل یہ احتجاج حکمران جماعت اور اپوزیشن کے درمیان ایک نئی سیاسی محاذ آرائی کا اشارہ دے رہا ہے۔
