پہلگام، 01 ستمبر
جنوبی کشمیر کے ضلع اننت ناگ کے سیاحتی مقام پہلگام میں منگل کے روز ہونے والی شدید بارش کے باعث کئی مقامات پر پانی جمع ہو گیا، جبکہ دریاۓ لڈر میں پانی کی سطح میں نمایاں اضافہ درج کیا گیا ہے۔
موسلادھار بارش کی وجہ سے اس پہاڑی علاقے کی متعدد سڑکیں اور نشیبی علاقے متاثر ہوئے، جس کے باعث آمدورفت میں مشکلات پیش آئیں۔
بارش کے بعد دریاۓ لڈر میں پانی کے تیز بہاؤ کی وجہ سے طغیانی کی صورتحال برقرار ہے، جبکہ انتظامیہ صورتحال پر مسلسل نظر رکھے ہوئے ہے۔
یہ بارش جموں و کشمیر میں جاری غیر مستحکم موسم کا حصہ تھی۔ محکمہ موسمیات سرینگر نے پہلے ہی چند مقامات پر ہلکی سے درمیانے درجے کی بارش اور گرچ چمک کی پیشگوئی کی تھی، اور خبردار کیا تھا کہ تیز بارشوں کے باعث حساس علاقوں میں فلیش فلڈ (ناگہانی سیلاب)، مٹی کے تودے گرنے اور لینڈ سلائیڈنگ کا خطرہ ہو سکتا ہے۔
پہلگام کے مقامی لوگوں اور سیاحوں کو محتاط رہنے کی ہدایت کی گئی ہے، خاص طور پر ندی نالوں اور حساس مقامات کے قریب جانے سے گریز کرنے کو کہا گیا ہے کیونکہ مزید بارشوں کا امکان برقرار ہے۔
