جنگ نیوز
نئی دہلی/ وزیر اعظم نریندر مودی نے جمعہ کو قومی جمہوری اتحاد (این ڈی اے) کے اتحادی جماعتوں سے تعلق رکھنے والے لوک سبھا کے تقریباً 45 ارکان پارلیمان سے ملاقات کی اور انہیں اپنے انتخابی حلقوں کی ترقی پر توجہ دینے، عوام سے مسلسل رابطے میں رہنے اور پارلیمان میں نظم و ضبط برقرار رکھنے کی تلقین کی۔
وزیر اعظم نے کہا کہ این ڈی اے ایک خاندان ہے اور ہر رکن کو یکساں احترام حاصل ہے۔ انہوں نے ارکان پر زور دیا کہ وہ اپنے حلقوں میں ترقیاتی کاموں کی مؤثر نگرانی کریں، عوامی مسائل کو سمجھیں اور کسانوں، مزدوروں اور عام شہریوں سے رابطہ برقرار رکھیں۔
پارلیمانی امور کے حوالے سے مودی نے ارکان کو مباحثوں میں فعال طور پر حصہ لینے اور ایوان کی کارروائی کو متاثر کرنے والے رویوں سے گریز کرنے کی ہدایت دی۔ انہوں نے کہا کہ پارلیمان ملک کے عوام کی امیدوں اور خواہشات کی نمائندگی کرتا ہے، اس لئے ارکان کو ایوان کے وقار کا خیال رکھنا چاہیے۔
وزیر اعظم نے ارکان پارلیمان کو اپنی صحت پر بھی توجہ دینے کا مشورہ دیا اور کہا کہ اچھی صحت مؤثر عوامی خدمت کے لئے ضروری ہے۔ انہوں نے ارکان سے ذاتی طور پر ملاقات کرکے ان کے مسائل اور تجربات بھی دریافت کیے۔
