جنگ نیوز
جدہ/ OIC کے میڈیا آبزرویٹری کی تازہ رپورٹ کے مطابق 30 جون سے 20 جولائی 2026 کے دوران غزہ اور مقبوضہ مغربی کنارے میں 109 فلسطینی جاں بحق جبکہ 396 دیگر زخمی ہوئے۔ رپورٹ کے مطابق ان میں 102 اموات اور 348 زخمی غزہ میں ریکارڈ کیے گئے، جہاں متعدد لاشیں ملبے سے بھی برآمد کی گئیں۔
رپورٹ میں دعویٰ کیا گیا ہے کہ مقبوضہ مغربی کنارے میں اسی عرصے کے دوران اسرائیلی افواج نے 882 فوجی کارروائیاں کیں، جن میں 7 فلسطینی جاں بحق، 48 زخمی اور 375 افراد کو گرفتار کیا گیا۔
OIC کے مطابق اس مدت میں 4 فلسطینی بچے جاں بحق، 4 زخمی اور 7 کو گرفتار کیا گیا، جبکہ اسرائیلی آبادکاروں کے مبینہ حملوں اور گاڑیوں کی ٹکر سے 5 بچے زخمی ہوئے۔
رپورٹ میں مزید دعویٰ کیا گیا کہ اسرائیلی آبادکاروں نے 277 حملے کیے اور 30 نئی آبادکاری سرگرمیاں انجام دیں۔ OIC کا کہنا ہے کہ جولائی کے آغاز سے 20 جولائی تک فلسطینی علاقوں میں مجموعی طور پر 2,980 مبینہ خلاف ورزیاں ریکارڈ کی گئیں۔
رپورٹ میں پیش کیے گئے یہ اعداد و شمار اور الزامات OIC کے میڈیا آبزرویٹری کے مشاہدات پر مبنی ہیں۔ اسرائیل اس سے قبل اپنی فوجی کارروائیوں اور سلامتی کی پالیسیوں سے متعلق بین الاقوامی اداروں کی متعدد رپورٹوں اور الزامات کو مسترد یا ان سے اختلاف کرتا رہا ہے۔
