جنگ نیوز
سرینگر/ نیشنل میڈیکل کمیشن (NMC) نے گورنمنٹ میڈیکل کالج (GMC) سری نگر میں MBBS کی مزید 50 نشستوں کی منظوری دے دی ہے، جس کے بعد تعلیمی سال 2026-27 سے سالانہ داخلہ گنجائش 200 سے بڑھ کر 250 ہو جائے گی۔
محکمہ صحت و طبی تعلیم کے مطابق میڈیکل اسیسمنٹ اینڈ ریٹنگ بورڈ (MARB) نے نیشنل میڈیکل کمیشن ایکٹ 2019 کے تحت یہ منظوری جاری کی ہے۔ گزشتہ تعلیمی سال 2025-26 میں بھی GMC سری نگر کو 20 اضافی نشستیں ملی تھیں، جس کے بعد نشستوں کی تعداد 180 سے بڑھ کر 200 ہو گئی تھی۔
محکمہ نے کہا کہ نئی منظوری سے نہ صرف طبی تعلیم کو فروغ ملے گا بلکہ جموں و کشمیر کے طلبہ کو ڈاکٹر بننے کے مزید مواقع بھی میسر آئیں گے، جبکہ GMC سری نگر کی حیثیت ملک کے ممتاز طبی اداروں میں مزید مستحکم ہوگی۔
