جنگ نیوز ڈیسک
وزیر اعلیٰ اور نیشنل کانفرنس کے نائب صدر عمر عبداللہ نے کہا ہے کہ نیشنل کانفرنس اقتدار کے حصول کے لئے اپنے اصولوں، نظریات اور سیاسی اقدار کا سودا نہیں کرے گی۔
بانڈی پورہ میں نامہ نگاروں سے گفتگو کرتے ہوئے عمر عبداللہ نے کہا کہ ہر سیاسی جماعت اپنے فیصلے لینے میں آزاد ہے، تاہم نیشنل کانفرنس اپنی تاریخی وراثت اور بنیادی نظریات پر قائم رہے گی۔
انہوں نے کہا، ’’نیشنل کانفرنس کی ایک طویل سیاسی تاریخ اور مضبوط نظریاتی بنیاد ہے۔ ہمارے اصول اور اقدار فروخت کے لئے نہیں ہیں۔ ہمیں کچھ بھی پیش کیا جائے، ہم اپنے اخلاقی اور سیاسی اصولوں کا سودا نہیں کریں گے۔‘‘
انہوں نے کہا کہ پارٹی کے فیصلے وقتی سیاسی مفادات کے بجائے عوامی مفاد اور اپنے نظریاتی تشخص کو مدنظر رکھ کر کیے جائیں گے۔
اس موقع پر وزیر اعلیٰ نے ضلع بانڈی پورہ میں تقریباً 300 کروڑ روپے مالیت کے مختلف ترقیاتی منصوبوں کا افتتاح اور جائزہ بھی لیا۔ انہوں نے سڑکوں، پینے کے پانی، بجلی، صحت اور دیگر عوامی سہولیات سے متعلق منصوبوں کی پیش رفت کا معائنہ کیا اور متعلقہ محکموں کو بروقت تکمیل کی ہدایت دی۔
عمر عبداللہ نے عوامی وفود سے ملاقات بھی کی اور انہیں یقین دلایا کہ عوامی مسائل اور شکایات کے ازالے کے لئے حکومت سنجیدگی سے اقدامات کرے گی۔
انہوں نے کہا کہ بنیادی ڈھانچے کی مضبوطی، عوامی خدمات میں بہتری اور متوازن ترقی حکومت کی اولین ترجیحات میں شامل ہیں، جبکہ نیشنل کانفرنس قومی سیاست میں ہونے والی تبدیلیوں کے باوجود اپنے سیاسی نظریات پر قائم رہے گی۔
