جنگ نیوز ڈیسک
سرینگر/ بی جے پی جموں و کشمیر کے جنرل سیکریٹری تنظیم اشوک کول نے الگ جموں ریاست کی کسی بھی تجویز کو مسترد کرتے ہوئے کہا ہے کہ جموں و کشمیر ایک ہے اور ایک ہی رہے گا، کسی تقسیم کی اجازت نہیں دی جائے گی۔
گاندربل میں وکست بھارت ضمانت برائے روزگار پروگرام سے متعلق اجلاس کے بعد صحافیوں سے بات کرتے ہوئے انہوں نے کہا کہ اس اسکیم میں خامیوں کا جائزہ لیا گیا ہے اور اب اس کی ترجیحات ازسرنو طے کی گئی ہیں۔ ان کے مطابق پروگرام میں پانی کے تحفظ، دیہی انفراسٹرکچر، دیہی روزگار اور قدرتی آفات کے دوران امداد پر توجہ دی جائے گی۔
اشوک کول نے جموں و کشمیر سے باہر تاجروں کو نشانہ بنانے کے واقعات کی سخت مذمت کرتے ہوئے کہا کہ ملک کے ہر شہری کو بھارت میں کہیں بھی رہنے اور کاروبار کرنے کا حق حاصل ہے۔ انہوں نے بتایا کہ اس معاملے پر اتراکھنڈ کے وزیر اعلیٰ اور پارٹی قیادت سے بھی بات کی گئی ہے اور تاجروں کے تحفظ کو یقینی بنانے پر زور دیا گیا ہے۔
