سہیل خان
لداخ کو ریاستی درجہ دینے اور چھٹے شیڈول میں شامل کرنے کے مطالبے پر لیہہ کے دارالحکومت میں بدھ کو احتجاج پرتشدد ہوگیا۔ چار افراد ہلاک اور 70 سے زائد زخمی ہوگئے۔ اس دوران مظاہرین نے بی جے پی کے دفتر اور CRPF کی ایک وین کو بھی آگ لگا دی۔ کارکن سونم وانگچک نے ان مظاہروں کو "Gen-Zانقلاب” قرار دیا ہے۔
لداخ کو 2019 میں آرٹیکل 370 کی منسوخی اور جموں و کشمیر کی تقسیم کے بعد ایک الگ مرکز کے زیر انتظام خطے کے طور پر تشکیل دیا گیا۔ تاہم جموں و کشمیر کے برعکس اسے مقننہ سے محروم رکھا گیا اور براہِ راست مرکزی حکومت کے ماتحت کر دیا گیا۔ اس کے بعد سے لداخ میں متعدد احتجاجی تحریکیں دیکھنے کو ملی ہیں جن میں ریاستی درجہ، چھٹے شیڈول کے تحت آئینی تحفظات، اور اپنی قبائلی شناخت اور نازک ماحولیاتی نظام کے تحفظ کے لیے زیادہ مقامی خودمختاری کا مطالبہ کیا گیا ہے۔
جو کچھ بدھوار کو لداخ میں پیش آیا وہ کسی المیہ سے کم نہیں۔ لیکن ایسے مواقع پر یہ سوال پوچھنا ضروری ہے کہ اصل میں اس افراتفری سے فائدہ کسے ہوا؟
بی جے پی کے رہنما امیت مالویہ نے لیہہ میں ہونے والے تشدد کی تصاویر اور ویڈیوز شیئر کرتے ہوئے اس کا تعلق کانگریس سے جوڑا۔انہوں نے ایکس پر لکھا:”لداخ میں فساد کرنے والا یہ شخص فنتسوگ اسٹانزِن سپاگ ہے، جو اپر لیہہ وارڈ سے کانگریس کا کونسلر ہے۔ اسے صاف طور پر بھیڑ کو اکساتے اور اس تشدد میں حصہ لیتے دیکھا جا سکتا ہے جس کا نشانہ بی جے پی دفتر اور ہل کونسل بنی۔”بی جے پی رہنما نے مزید کہا:”کیا یہ وہی قسم کی بدامنی ہے جس کا خواب راہل گاندھی دیکھ رہے ہیں؟”
حکومت کے ساتھ بات چیت پہلے ہی 6 اکتوبر کو طے تھی اور غیر رسمی گفتگو کے لئے 25 اور 26 ستمبر کو بھی تاریخیں آگے بڑھائی گئی تھیں۔ جب مذاکرات کا عمل جاری تھا تو پھر تشدد کو کیوں بھڑکایا گیا؟ حقائق اس جانب اشارہ کرتے ہیں کہ بات چیت کو پٹری سے اتارنے اور عقل و دلیل کی جگہ بدامنی کو مسلط کرنے کی دانستہ کوشش کی گئی۔
سونم وانگچک کا ایجنڈا عرصے سے واضح ہے۔ وہ کھلے عام لداخ میں "عرب اسپرنگ” لانے کی بات کر چکے ہیں اور نیپال کی Gen-Z تحریک کی تعریف کر چکے ہیں۔ تعمیراتی انداز میں شامل ہونے کے بجائے انہوں نے ایک خطرناک راستہ اختیار کیا۔ انہوں نے اپنے مالیاتی بے ضابطگیوں اور ذاتی کوتاہیوں کو چھپانے کے لئے نوجوانوں کو ڈھال بنایا اور انہیں ایسے تصادم میں جھونکا جس نے عوامی مفاد سے زیادہ ان کی سیاسی پالیسیوں کی خدمت کی۔
کانگریس پارٹی نے بھی اس تصادم کی بنیادیں پہلے سے رکھنی شروع کر دی تھیں۔ کبھی سرکاری دفاتر پر پتھراؤ کی باتیں، کبھی کارروائی کی دھمکیاں، اور کبھی نوجوانوں میں غصہ بھڑکانا۔ یوں نوجوانوں کو آہستہ آہستہ تصادم کی طرف دھکیلا گیا۔ یہ کسی قدرتی جذباتی ابھار کا نتیجہ نہیں تھا بلکہ ایک سوچا سمجھا اور لکھا ہوا اسکرپٹ تھا جسے وقت آنے پر پھاڑ دیا گیا۔
آخرکار سب سے زیادہ نقصان لداخ کے نوجوانوں کو ہی ہوا۔ ان کی توانائی، ان کا جوش اور ان کے جذبات کو سیاسی فائدے کے لئے ہتھیار بنایا گیا۔ اس کا الزام ان پر نہیں بلکہ ان لوگوں پر ہے جنہوں نے انہیں شطرنج کے مہرے بنا کر اپنے مفادات کی تکمیل کی۔
تشدد کے بعد حکام نے بی این ایس ایس کی دفعہ 163 کے تحت پابندی کے احکامات نافذ کیے، جس کے تحت پانچ یا اس سے زیادہ افراد کے جمع ہونے پر پابندی عائد کر دی گئی۔اس تشدد کی وجہ سے سالانہ دو روزہ لداخ فیسٹیول بھی درمیان میں ہی روک دیا گیا۔ انتظامیہ کو تقریب منسوخ کرنے پر مجبور ہونا پڑا۔ حکام نے اس فیصلے پر افسوس کا اظہار کرتے ہوئے کہا کہ یہ "ناقابلِ گریز حالات” تھے اور مقامی فنکاروں، ثقافتی گروپوں اور سیاحوں سے معذرت کی جو اس تقریب میں حصہ لینے اور دیکھنے آئے تھے۔
لداخ کا المیہ صرف یہ بدامنی نہیں بلکہ یہ بھی ہے کہ نوجوانوں کے اعتماد کو دھوکہ دیا گیا۔ وہ لوگ جو ان کے ترجمان بننے کا دعویٰ کرتے تھے دراصل اپنی ذاتی اور سیاسی بازی جیتنے کے لئے ان کی قربانی دیتے رہے۔
