جنگ نیوز ڈیسک
ترال/عوامی اتحاد پارٹی (اے آئی پی) کے چیف ترجمان عنایت النبی نے ترال میں پارٹی کارکنوں کے اجلاس سے خطاب کرتے ہوئے وزیرِ اعلیٰ عمر عبداللہ کی ترجیحات پر سوال اٹھائے۔ انہوں نے کہا کہ بے روزگاری، ڈیلی ویجروں کی مستقلی اور ریزرویشن پالیسی میں معقولیت لانے جیسے مسائل حل کیے بغیر حکومت مزید کتنے میراتھن منعقد کرے گی؟
عنایت النبی نے کہا کہ حکمرانی کا اصل امتحان بڑے پروگرام منعقد کرنا نہیں، بلکہ عوامی مسائل حل کرنے کے لئے ٹھوس اقدامات کرنا ہے۔
انہوں نے ریزرویشن پالیسی میں معقولیت لانے پر زور دیتے ہوئے کہا کہ جنرل کیٹیگری کے امیدوار تقریباً دو برس سے بامعنی فیصلے کے منتظر ہیں۔ ان کی محنت، بے چینی اور منصفانہ مواقع کی امیدوں کو سنجیدگی سے لینے کی ضرورت ہے۔
انہوں نے ڈیلی ویجروں، کنٹریکچول اور کنسولیڈیٹڈ ملازمین کی مستقلی کے لئے بھی ایک قابلِ اعتماد اور مقررہ مدت پر مبنی لائحۂ عمل وضع کرنے کا مطالبہ کیا۔
عنایت النبی نے کہا، ’’وزیرِ اعلیٰ صاحب، میراتھن گننا بند کریں اور حکمرانی کا حساب دینا شروع کریں۔ پہلے عوام کی مشکلات کا میراتھن ختم کریں۔ لوگوں کو نمائشی پروگراموں اور ادھورے وعدوں کے بجائے منصفانہ مواقع، تحفظ اور مسائل کا حل درکار ہے۔‘‘
