جنگ نیوز ڈیسک
سرینگر/نیشنل کانفرنس کے صدر ڈاکٹر فاروق عبداللہ نے پیر کو بیروہ حلقے کے ارواہ علاقے میں پارٹی کارکنوں کے کنونشن سے خطاب کرتے ہوئے دفعہ 370، 35A اور جموں و کشمیر کے مکمل ریاستی درجے کی بحالی کے لئے جدوجہد جاری رکھنے کے عزم کا اظہار کیا۔ کنونشن کا اہتمام بیروہ کے رکنِ اسمبلی ڈاکٹر شفیع احمد وانی نے کیا۔
کنونشن میں صوبائی صدر شوکت احمد میر، سینٹرل زون صدر و چاڈورہ کے رکنِ اسمبلی علی محمد ڈار، ضلع صدر بڈگام غلام نبی بٹ، رئیس احمد متو اور محمد اشرف متو سمیت دیگر عہدیداران اور کارکنان شریک ہوئے۔
ڈاکٹر فاروق عبداللہ نے کہا کہ نیشنل کانفرنس نے ہمیشہ عوام کے آئینی حقوق، جمہوری اداروں اور سماجی انصاف کے تحفظ کے لئے کام کیا ہے۔ انہوں نے پارٹی کی تاریخی زمین اصلاحات اور تعلیمی خدمات کا ذکر کرتے ہوئے کارکنوں پر زور دیا کہ وہ اتحاد برقرار رکھیں۔
پی ڈی پی کو تنقید کا نشانہ بناتے ہوئے انہوں نے الزام لگایا کہ 2014 میں بی جے پی کو جموں و کشمیر میں اقتدار تک پہنچانے کے فیصلے کے سنگین نتائج برآمد ہوئے۔ انہوں نے دفعہ 370 سے متعلق سپریم کورٹ کے 2024 کے فیصلے پر بھی اعتراض کیا۔
ڈاکٹر فاروق نے ریاستی درجے کی بحالی میں تاخیر اور منتخب حکومت کے اختیارات سے متعلق وعدوں کی عدم تکمیل پر سوال اٹھاتے ہوئے کہا کہ عوام اپنے جائز حقوق کے منتظر ہیں۔
انہوں نے کہا کہ وزیرِ اعلیٰ عمر عبداللہ کی قیادت میں حکومت محدود وسائل اور مشکل حالات کے باوجود ترقیاتی کاموں کو آگے بڑھانے کی کوشش کر رہی ہے۔
اس موقع پر ڈاکٹر شفیع احمد وانی نے بیروہ میں جاری ترقیاتی منصوبوں اور بنیادی سہولیات کی بہتری کے لئے مختص فنڈز کا ذکر کرتے ہوئے حلقے کے زیرِ التوا مسائل حل کرنے کے عزم کا اظہار کیا۔
