جنگ نیوز ڈیسک
سرینگر، 21 اگست: ڈاکٹر مہجبین نبی کی زیرِ سرپرستی قائم کیئر فاؤنڈیشن اینڈ چیریٹیبل ٹرسٹ کے وفد نے ڈپٹی کمشنر سرینگر سے ملاقات کر کے ضلع میں منشیات کی بڑھتی لت اور اس کے تدارک پر تبادلۂ خیال کیا۔
وفد کی نمائندگی یوتھ پریذیڈنٹ عمیر اشرف اور فعال رکن سید فرہت نے کی۔ ملاقات میں زکورہ–گلاب باغ اور سرینگر کے مضافاتی علاقوں میں بھنگ کی کاشت کے خاتمے، نوجوانوں میں بیداری اور منشیات مخالف مہمات میں ان کی شمولیت پر زور دیا گیا۔
ڈپٹی کمشنر نے یقین دلایا کہ جموں و کشمیر پولیس، محکمہ ایکسائز اور دیگر متعلقہ اداروں کے تعاون سے اس معاملے پر ترجیحی بنیادوں پر کارروائی کی جائے گی۔
آخر میں کیئر فاؤنڈیشن اینڈ چیریٹیبل ٹرسٹ نے ڈپٹی کمشنر کو منشیات مخالف مہمات اور نشا مکت بھارت ابھیان کے فروغ میں خدمات کے اعتراف میں سائٹیشن آف کمٹمنٹ پیش کی۔
