جنگ نیوز
جموں و کشمیر پردیش کانگریس کمیٹی کے صدر طارق قرہ نے کہا ہے کہ کشمیر ہمیشہ سے بھارت کا اٹوٹ حصہ رہا ہے اور پوری دنیا اس حقیقت سے واقف ہے۔
انہوں نے سرینگر کے دورے پر آئے بھارت میں امریکی سفیر سرجیو گور کے کشمیر کو ’’بھارت کا اہم حصہ‘‘ قرار دینے سے متعلق بیان پر سوال اٹھاتے ہوئے کہا کہ معلوم نہیں یہ بات کس تناظر میں کہی گئی۔
طارق قرہ نے کہا کہ کشمیر کی بھارت کے ساتھ حیثیت ایک طے شدہ حقیقت ہے اور اسے کسی غیر ملکی نمائندے کی توثیق کی ضرورت نہیں۔
انہوں نے کشمیر سمیت دیگر معاملات میں تیسرے فریق کی مداخلت کو موجودہ مرکزی حکومت کی ناکام پالیسی قرار دیتے ہوئے کہا کہ ’’آپریشن سندور‘‘ ہو یا کشمیر، ہر معاملے میں تیسرے فریق کی شمولیت حکومت کی ناکامی کو ظاہر کرتی ہے۔
پاکستان کی جانب سے امریکی ناظم الامور کو طلب کیے جانے سے متعلق سوال پر طارق قرہ نے اسے پاکستان کا داخلی معاملہ قرار دیا۔
