جنگ نیوز
جموں/ BJP نے 20 جولائی کو کشمیر بھر میں نیشنل کانفرنس حکومت کے خلاف بڑے پیمانے پر احتجاج کرنے کا اعلان کیا ہے۔ اس فیصلے کا اعلان جموں کشمیرBJP صدر اور راجیہ سبھا رکن ست شرما نے پارٹی ہیڈکوارٹر تریکوٹہ نگر جموں میں سینئر رہنماؤں کے اجلاس کے بعد کیا۔
ست شرما نے الزام عائد کیا کہ عمر عبداللہ کی قیادت والی حکومت بہتر طرزِ حکمرانی، روزگار، بنیادی سہولیات اور شفاف انتظامیہ فراہم کرنے میں ناکام رہی ہے، جبکہ ریاستی درجے (Statehood) کا معاملہ اٹھا کر اپنی ناکامیوں سے عوام کی توجہ ہٹانے کی کوشش کر رہی ہے۔
اس موقع پر قائدِ حزبِ اختلاف سنیل شرما نے کہا کہ موجودہ حکومت میں بدعنوانی کو فروغ ملا ہے اور آؤٹ سورسنگ کی پالیسی سے نوجوانوں کے روزگار کے مواقع متاثر ہو رہے ہیں۔ انہوں نے پنچایت انتخابات میں تاخیر پر بھی حکومت کو تنقید کا نشانہ بناتے ہوئے کہا کہ اس سے جمہوری ادارے کمزور ہو رہے ہیں۔
اجلاس میں 20 جولائی کے احتجاج کی حکمت عملی کو حتمی شکل دیتے ہوئے فیصلہ کیا گیا کہ BJP حکومت کی مبینہ ناکامیوں، بدعنوانی، نوجوان مخالف پالیسیوں اور عوامی مسائل کو کشمیر کے ہر گوشے تک پہنچائے گی۔
