جنگ نیوز
آبنائے ہرمز میں متحدہ عرب امارات کے دو آئل ٹینکروں پر مبینہ ایرانی میزائل حملے کے نتیجے میں ایک بھارتی ملاح ہلاک جبکہ چھ دیگر بھارتی شہری زخمی ہو گئے۔ اس واقعے کے بعد بھارت نے ایران کے خلاف سخت احتجاج ریکارڈ کراتے ہوئے بحری جہازوں اور بھارتی ملاحوں پر حملوں کو ناقابلِ قبول قرار دیا ہے۔
متحدہ عرب امارات کی وزارتِ دفاع کے مطابق دونوں ٹینکر عمانی سمندری حدود کے قریب آبنائے ہرمز سے گزر رہے تھے کہ انہیں دو ایرانی کروز میزائلوں سے نشانہ بنایا گیا، جس کے باعث جہازوں میں آگ بھڑک اٹھی اور مالی نقصان بھی ہوا۔
بھارتی وزارتِ خارجہ نے نئی دہلی میں ایران کے نائب سربراہِ مشن کو طلب کر کے شدید احتجاج ریکارڈ کرایا اور عالمی بحری راستوں پر جہاز رانی کے تحفظ کو یقینی بنانے پر زور دیا۔ وزارت نے کہا کہ حالیہ حملے نہ صرف بھارتی ملاحوں کی جانوں کے لئے خطرہ ہیں بلکہ بین الاقوامی تجارت اور سمندری سلامتی کے لئے بھی سنگین چیلنج ہیں۔
ادھر امریکی صدر ڈونلڈ ٹرمپ نے آبنائے ہرمز سے گزرنے والے بحری جہازوں پر مجوزہ 20 فیصد ٹرانزٹ فیس عائد کرنے کی تجویز واپس لیتے ہوئے خلیجی ممالک کے ساتھ سرمایہ کاری اور تجارتی معاہدوں کو ترجیح دینے کا اعلان کیا ہے۔
