جنگ نیوز ڈیسک
جموں، 3 جولائی: نگروٹا اسمبلی حلقے کی ایم ایل اے دیویانی رانا نے خواتین کو معاشی طور پر بااختیار بنانے کے مقصد سے روبل ناگی آرٹ فاؤنڈیشن کے تعاون سے نگروٹا میں ایک اسکل ڈیولپمنٹ سینٹر قائم کرنے کا اعلان کیا ہے۔
اس سلسلے میں معروف سماجی کارکن اور ماہر تعلیم روبل ناگی نے پنچایت گھینک کا دورہ کیا، جہاں مقامی خواتین سے ملاقات کے دوران انہیں روزگار پر مبنی ہنر کی تربیت فراہم کرنے کے منصوبے سے آگاہ کیا گیا۔ اس مرکز میں خواتین کو مختلف پیشہ ورانہ مہارتیں سکھائی جائیں گی تاکہ وہ خود روزگار کے قابل بن سکیں اور اپنی معاشی حالت بہتر بنا سکیں۔
دیویانی رانا نے کہا کہ خواتین کو بااختیار بنانا ہی معاشرے کی حقیقی ترقی ہے، جبکہ روبل ناگی نے کہا کہ ہنرمندی خواتین کو خود مختار بنانے کا مؤثر ذریعہ ہے اور یہ مرکز انہیں بہتر مستقبل کی جانب گامزن کرے گا۔ پروگرام میں شریک خواتین نے اس اقدام کا خیر مقدم کرتے ہوئے اسے روزگار اور خود انحصاری کے نئے مواقع پیدا کرنے کی جانب ایک اہم قدم قرار دیا۔
