جنگ نیوز
سرینگر/ وزیر اعلیٰ کے مشیر ناصر اسلم وانی نے کہا ہے کہ کشمیری پنڈتوں کی ہجرت کے لئے پورے کشمیری معاشرے کو ذمہ دار نہیں ٹھہرایا جا سکتا اور اس مسئلے کے حل کے لئے الزام تراشی کے بجائے مکالمہ اور مفاہمت ضروری ہے۔
سرینگر میں منعقدہ گلوبل کشمیری پنڈت کنکلیو سے خطاب کرتے ہوئے انہوں نے اعلان کیا کہ حکومت کشمیری پنڈتوں کی واپسی اور بازآبادکاری کے لئے قائم ایپکس کمیٹی کو دوبارہ فعال بنانے کی کوشش کرے گی۔
ناصر اسلم وانی نے کہا کہ کشمیری پنڈتوں کے بغیر کشمیر نامکمل ہے اور ان کی باعزت واپسی کے لئے اعتماد سازی ناگزیر ہے۔ انہوں نے کہا کہ ماضی میں مختلف بازآبادکاری پیکجوں اور اقدامات کے باوجود اصل مقصد تبھی حاصل ہوگا جب کشمیری پنڈت اور مسلمان دوبارہ مل جل کر رہیں گے۔
انہوں نے زور دے کر کہا کہ مشترکہ تاریخ، ثقافت اور روایات کے تحفظ کے لئے دونوں برادریوں کا ساتھ رہنا ضروری ہے۔
