جنگ نیوز
حکومت کی کفایت شعاری مہم کے تحت وزیرِاعظم نریندر مودی نے بدھ کے روز دہلی میں کابینہ اجلاس کے لئے صرف دو گاڑیوں کے قافلے کے ساتھ سفر کیا۔ عام طور پر وی آئی پی شخصیات کے بڑے اور طویل قافلوں کے برعکس اس بار محدود گاڑیوں کا استعمال کیا گیا، جسے ایندھن کی بچت اور سادگی کی علامت قرار دیا جا رہا ہے۔
رپورٹس کے مطابق مودی کی سیکیورٹی کے لئے صرف ضروری گاڑیاں ہی شامل رکھی گئیں، جبکہ غیر ضروری گاڑیوں کو کم کر دیا گیا۔ حکومت اس وقت مختلف وزارتوں، سرکاری اداروں اور وی آئی پی شخصیات کے سفری اخراجات اور ایندھن کے استعمال میں کمی کے لئے نئی ہدایات تیار کر رہی ہے۔
ذرائع کے مطابق کئی ریاستوں کو بھی ہدایت دی گئی ہے کہ سرکاری تقریبات اور قافلوں میں غیر ضروری اخراجات سے گریز کیا جائے۔ خاص طور پر ان ریاستوں میں، جہاں ایندھن کی کھپت اور سرکاری اخراجات میں اضافہ دیکھنے میں آیا ہے، کفایت شعاری مہم کو تیز کرنے پر زور دیا جا رہا ہے۔
ادھر وزیرِداخلہ امت شاہ نے بھی اپنے سرکاری قافلے کا حجم نمایاں طور پر کم کر دیا ہے۔ بتایا جا رہا ہے کہ ان کے قافلے میں گاڑیوں کی تعداد پچاس فیصد سے زیادہ کم کی گئی ہے۔ سیاسی حلقوں کا ماننا ہے کہ اس اقدام کے بعد دیگر رہنماؤں اور وزراء میں بھی مختصر قافلوں کا رجحان بڑھ سکتا ہے۔
ماہرین کے مطابق ایسے اقدامات نہ صرف ایندھن کی بچت میں مددگار ثابت ہوں گے بلکہ عوام میں یہ پیغام بھی جائے گا کہ حکومت مشکل معاشی حالات میں سادگی اور ذمہ داری کا مظاہرہ کر رہی ہے۔
ایندھن بچاؤ اپیل کی جموں کشمیر میںپذیرائی
لیفٹیننٹ گورنر سنہا اور اعلیٰ افسران نے قافلے کا حجم 50 فیصد کم کیا
جنگ نیوز
جموں و کشمیر کے لیفٹیننٹ گورنر منوج سنہا نے وزیرِاعظم نریندر مودی کی اپیل کے بعد اپنے سرکاری قافلے کا حجم 50 فیصد کم کرنے کا فیصلہ کیا ہے۔ حکام کے مطابق اس اقدام کا مقصد ایندھن کی بچت اور وسائل کا مؤثر استعمال یقینی بنانا ہے۔
ڈی جی پی نالین پربھات، آئی جی پی کشمیر وی کے بردی اور کئی اعلیٰ افسران نے بھی اپنے قافلوں کو نصف کر دیا ہے۔ حکام کا کہنا ہے کہ یہ قدم کفایت شعاری نہیں بلکہ ذمہ دارانہ اور محتاط وسائل کے استعمال کی مہم کا حصہ ہے۔
حکام کے مطابق حکومت کی جانب سے ترقیاتی اخراجات، فلاحی اسکیموں یا بنیادی ڈھانچے کے منصوبوں میں کسی قسم کی کٹوتی زیرِ غور نہیں۔ وزیرِاعظم نے عوام سے غیر ضروری سفر کم کرنے، عوامی ٹرانسپورٹ کے استعمال اور ممکن ہو تو آن لائن میٹنگز اختیار کرنے کی اپیل کی ہے۔
