جنگ نیوز ڈیسک
وزیر دفاع راج ناتھ سنگھ کی سربراہی میں دفاعی حصولی کونسل ڈی اے سی نے جمعرات کو 114 رافیل لڑاکا طیاروں، جنگی میزائلوں، اے ایس ایچ اے پی ایس اور دیگر دفاعی ساز و سامان کی خریداری کے عمل کو منظوری دے دی، جس کی مجموعی لاگت6.3 لاکھ کروڑ روپے ہے۔
یہ منظوری فرانسیسی صدر ایمانوئل میکرون کے 17 سے 19 فروری کے درمیان مجوزہ دورہ بھارت سے چند روز قبل دی گئی ہے۔ ڈی اے سی نے امریکی بحریہ کے لیے چھ اضافی پی ایٹ آئی میری ٹائم نگرانی اور آبدوز شکن جنگی طیاروں کی خریداری کی بھی منظوری دی۔ اعلیٰ حکام کے مطابق منصوبہ ہے کہ 114 میں سے 90 رافیل طیارے ملک میں تیار کیے جائیں گے، جن میں تقریباً 50 فیصد مقامی مواد شامل ہوگا۔
نئی دہلی طویل عرصے سے اپنی مسلح افواج کے لیے مشینری اور اسلحہ درآمد کرنے پر انحصار کرتا رہا ہے، تاہم وزیر اعظم نریندر مودی کی حالیہ کوششوں نے ملکی دفاعی پیداوار کو نمایاں فروغ دیا ہے۔
بھارتی فضائیہ کے لیے اس دور کا آغاز 1980 کی دہائی میں ہوا تھا، مگر حقیقی پیش رفت گزشتہ ایک دہائی میں سامنے آئی جب مقامی طور پر تیار کردہ تیجس لڑاکا طیارہ سوویت دور کے مگ 21 طیاروں کے متبادل کے طور پر شامل کیا گیا۔
ہندوستان ایروناٹکس لمیٹڈ ہال کے پاس تیجس کے جدید ایم کے ون اے ماڈل کے تقریباً 180 طیاروں کے ملکی آرڈر موجود ہیں، تاہم جی ای ایرو اسپیس میں انجن سپلائی چین کے مسائل کے باعث اب تک ان کی ترسیل شروع نہیں ہو سکی ہے۔
وزارت دفاع کے مطابق دفاعی حصولی کونسل نے فضائیہ کے لیے مزید رافیل لڑاکا طیاروں اور میزائلوں، فوج کے لیے اینٹی ٹینک میزائلوں اور بحریہ کے لیے پی ایٹ آئی نگرانی طیاروں کی ابتدائی منظوری دے دی ہے۔
