ادیس ابابا: وزیر اعظم نریندر مودی کو ایتھوپیا کے صدر کی جانب سے ملک کے سب سے بڑے شہری اعزاز ‘دی گریٹ آنر نشان آف ایتھوپیا’ سے سرفراز کیا گیا۔ یہ اعزاز انہیں دونوں ممالک کے درمیان مضبوط تعلقات، باہمی تعاون اور عالمی قیادت کے اعتراف میں دیا گیا۔ یہ وزیر اعظم مودی کو ملنے والا 28واں بین الاقوامی ریاستی اعزاز ہے۔
اپنے خطاب میں وزیر اعظم مودی نے کہا کہ یہ اعزاز صرف ان کا نہیں بلکہ ہندوستان کے 140 کروڑ عوام کا ہے۔ انہوں نے ایتھوپیا کی قدیم تہذیب، عوام کی گرم جوشی اور دوطرفہ تعلقات کو مزید مستحکم بنانے کے عزم کا اظہار کیا۔
کار ڈپلومیسی میں نیا عالمی رجحان
وزیر اعظم مودی اور ایتھوپیا کے وزیر اعظم آبی احمد کے درمیان گاڑی میں سفر کو عالمی میڈیا نے سفارتی تعلقات میں ایک نئے رجحان کے طور پر پیش کیا ہے۔ اس سے قبل روسی صدر ولادیمیر پوتن کے ساتھ بھی وزیر اعظم مودی کی اسی طرز کی ملاقاتوں کو ذاتی سفارت کاری کی علامت قرار دیا گیا تھا۔
ثقافتی استقبال اور روایتی کافی تقریب
ادیس ابابا ایئرپورٹ پر ایتھوپیا کے وزیر اعظم آبی احمد نے خود وزیر اعظم مودی کا استقبال کیا۔ اس موقع پر روایتی ایتھوپیائی کافی تقریب کا اہتمام کیا گیا، جسے دونوں ممالک کے درمیان تاریخی دوستی اور احترام کی علامت قرار دیا گیا۔
یہ دورہ ہندوستان اور ایتھوپیا کے تعلقات کو ایک نئی بلندی تک لے جانے کی امید کے طور پر دیکھا جا رہا ہے۔
