سرینگر، 04 مئی: جموں و کشمیر سے حج 2025 کے پہلے قافلے نے آج سرینگر بین الاقوامی ہوائی اڈے سے روانگی اختیار کی۔ لیفٹیننٹ گورنر شری منوج سنہا اور وزیر اعلیٰ شری عمر عبداللہ نے حج قافلے کو روانہ کرتے ہوئے عازمین کو نیک خواہشات اور دعاؤں کے ساتھ رخصت کیا۔
دونوں رہنماؤں نے روانہ ہونے والے عازمین سے ملاقات کی اور ان کے محفوظ سفر اور روحانی طور پر بابرکت حج کی دعا کی۔ لیفٹیننٹ گورنر منوج سنہا نے اس موقع پر کہا کہ حج ایک مقدس سفر اور زندگی بھر کی ایک عزیز خواہش ہے، اور حکومت اس مقدس فریضے کے لیے بہترین انتظامات یقینی بنانے کے لیے پرعزم ہے۔ وزیر اعلیٰ عمر عبداللہ نے عازمین سے اپیل کی کہ وہ جموں و کشمیر میں پائیدار امن، ترقی اور عوام کی سلامتی کے لیے دعا کریں۔
آج 178 عازمین حج نے سعودی عرب کے لیے پہلی براہ راست پرواز میں سفر کیا۔ رواں برس جموں و کشمیر سے تقریباً 3622 اور لداخ سے 242 عازمین حج کا فریضہ ادا کریں گے۔ سرینگر بین الاقوامی ہوائی اڈے سے 4 مئی سے 15 مئی 2025 تک 11 خصوصی پروازیں چلائی جائیں گی۔
عازمین کی سہولت کے لیے ہوائی اڈے اور حج ہاؤس میں جامع انتظامات کیے گئے تھے، جن میں نقل و حمل، قیام و طعام، سامان کی جانچ، سیکیورٹی اسکریننگ، کھانے پینے، نماز کی سہولت، سفری دستاویزات کی تقسیم اور بورڈنگ پاس کے فوری اجراء شامل ہیں۔ عازمین کو جدہ میں بھارت کے قونصل جنرل وصول کریں گے۔
اس موقع پر مشیر وزیر اعلیٰ ناصر اسلم وانی، ایڈیشنل چیف سکریٹری دھیرج گپتا، ڈویژنل کمشنر کشمیر وجے کمار بھدوری، آئی جی پی کشمیر ودھی کمار برڈی، ڈپٹی کمشنر بڈگام اکشے لابرو، جے اینڈ کے حج کمیٹی کے اراکین اور سول و پولیس انتظامیہ کے سینئر افسران بھی موجود تھے۔
عازمین نے عمدہ اور موثر انتظامات پر حکومت کا شکریہ ادا کیا۔
