جنگ نیوز
کولکاتا/ مغربی بنگال کے شمالی کولکاتا کے چور باغان علاقے میں ہفتے کی شام درگا پوجا پنڈال میں بھگدڑ مچنے سے 19 افراد ہلاک اور 25 زخمی ہوگئے۔ حکام کے مطابق واقعہ شام تقریباً 7:40 بجے گریش پارک پولیس تھانے کی حدود میں پیش آیا، جب بارش کے دوران پنڈال میں بڑی تعداد میں لوگ جمع تھے۔
ایک سینئر پولیس افسر کے مطابق، بارش شروع ہوتے ہی پنڈال کے باہر انتظار کرنے والے افراد آگے بڑھنے لگے، جس کے نتیجے میں کچھ لوگ سڑک پر گر پڑے اور بھگدڑ مچ گئی۔ زخمیوں کو کلکتہ میڈیکل کالج منتقل کیا گیا، جہاں ان کا علاج جاری ہے۔
وزیر اعلیٰ سوویندو ادھیکاری نے بتایا کہ بیشتر مہلوکین خواتین اور بچے ہیں۔ انہوں نے ہر مہلوک کے اہلِ خانہ کے لئے 25 لاکھ روپے معاوضے اور ایک سرکاری ملازمت، جبکہ زخمیوں کے لئے 5 لاکھ روپے امداد کا اعلان کیا۔ ان کے مطابق 24 زخمیوں کی حالت خطرے سے باہر ہے، جبکہ ایک کی حالت تشویش ناک ہے۔
وزیر اعلیٰ نے کہا کہ پنڈال میں انتظامات کی خامیوں اور بارش سمیت واقعے کے اسباب کی تحقیقات کی جائیں گی۔ پنڈال کو سیل کر دیا گیا ہے، جبکہ فرانزک ٹیم، اسپیشل ٹاسک فورس اور فائر بریگیڈ تحقیقات میں مصروف ہیں۔ سی سی ٹی وی فوٹیج کا بھی جائزہ لیا جا رہا ہے۔ انہوں نے کہا کہ کلکتہ ہائی کورٹ کے ایک برسرِ عہدہ جج کی سربراہی میں حقائق معلوم کرنے والی کمیٹی تشکیل دی جائے گی۔
پولیس نے پوجا منتظمین سمیت 10 افراد کو حراست میں لے کر پوچھ گچھ شروع کر دی ہے۔ پولیس، فائر بریگیڈ، آفات سے نمٹنے والی ٹیموں اور طبی عملے نے امدادی کارروائیوں میں حصہ لیا۔
گورنر آر این روی اور ممتا بنرجی نے واقعے پر افسوس کا اظہار کرتے ہوئے مہلوکین کے اہلِ خانہ سے تعزیت اور زخمیوں کی جلد صحت یابی کے لئے نیک خواہشات ظاہر کیں۔
