بڈگام، 01 اکتوبر
وسطی کشمیر کے ضلع بڈگام کے چڈورہ کے برین وار علاقے میں ایک 44 سالہ شخص مشکوک حالات میں مردہ پایا گیا، جس کے بعد اہلخانہ نے قتل کا الزام عائد کرتے ہوئے انصاف کی فراہمی کے لیے احتجاج کیا۔
متوفی کی شناخت فیاض احمد وگے ولد غلام قادر وگے ساکن ہانگو سورس یار، چڈورہ کے طور پر ہوئی ہے۔
جی این ایس کے مطابق، اہلخانہ کا کہنا ہے کہ فیاض کی موت قدرتی معلوم نہیں ہوتی اور انہیں خدشہ ہے کہ اسے قتل کیا گیا ہے۔ انہوں نے اس موت کے پیچھے چھپی سچائی کو سامنے لانے کے لیے شفاف اور منصفانہ تحقیقات کا مطالبہ کیا ہے۔
لاپتہ شخص کی لاش ملنے کے فوراً بعد اسے قانونی و طبی لوازمات کے لیے ہسپتال منتقل کر دیا گیا۔ پولیس نے معاملے کا نوٹس لیتے ہوئے ضروری کارروائی شروع کر دی ہے۔
حکام کا کہنا ہے کہ موت کی اصل وجہ پوسٹ مارٹم رپورٹ آنے کے بعد ہی معلوم ہو سکے گی۔
اس دوران، پولیس نے واقعے کا نوٹس لے کر مزید تحقیقات کا آغاز کر دیا ہے۔
