فیضان پنجابی
جنگ نیوز
سری نگر/جموں و کشمیر کے مختلف علاقوں میں پیر کو ہلکی بارش اور گرج چمک کے ساتھ افروٹ چوٹی، گلمرگ پر تازہ برف باری ریکارڈ کی گئی، جس سے خطے میں موسم خوشگوار اور سرد ہوگیا۔
محکمہ موسمیات سری نگر کے مطابق گلمرگ میں زیادہ سے زیادہ درجہ حرارت ۲۰.۸ اور کم سے کم ۵.۵ ڈگری سیلسیس ریکارڈ کیا گیا، جو معمول سے ۱.۴ ڈگری کم اور اس موسم کا اب تک کا کم ترین درجہ حرارت ہے۔
سری نگر میں زیادہ سے زیادہ درجہ حرارت ۲۹.۸، پہلگام میں ۲۴.۸ اور جموں میں ۳۱.۴ ڈگری سیلسیس رہا۔ گزشتہ ۲۴ گھنٹوں کے دوران بھدرواہ میں ۶.۲، بٹوٹ میں ۱.۴ ملی میٹر، جبکہ اے آر جی بکور میں سب سے زیادہ ۱۶.۵ ملی میٹر بارش ریکارڈ کی گئی۔
محکمہ موسمیات نے ۲۹ ستمبر سے ۳ اکتوبر تک موسم عمومی طور پر خشک رہنے کی پیش گوئی کی ہے، جبکہ ۴ سے ۶ اکتوبر اور ۹ و ۱۰ اکتوبر کو بعض مقامات پر ہلکی بارش، بالائی علاقوں میں برف باری، گرج چمک اور تیز ہوائیں چلنے کا امکان ظاہر کیا ہے۔
محکمہ نے کسانوں کو سیب، دھان اور دیگر فصلوں کی کٹائی جاری رکھنے اور تیار فصلوں کو محفوظ مقامات پر ذخیرہ کرنے کا مشورہ دیا ہے۔
