جنگ نیوز ڈیسک
بڈگام، 22 ستمبر:
ڈسٹرکٹ انفارمیشن آفیسر بڈگام میر لیاقت علی نے انڈور اسپورٹس اسٹیڈیم بڈگام میں ضلعی تائیکوانڈو چیمپئن شپ 2026 کا افتتاح کیا۔
تائیکوانڈو ایسوسی ایشن آف ڈسٹرکٹ بڈگام نے ضلع انتظامیہ بڈگام کے اشتراک سے منعقدہ دو روزہ چیمپئن شپ میں 335 نوجوان کھلاڑی حصہ لے رہے ہیں۔ مقابلہ 22 اور 23 ستمبر کو جاری رہے گا، جبکہ آئندہ یوٹی سطح کی تائیکوانڈو چیمپئن شپ کے لیے ضلعی ٹیم بھی منتخب کی جائے گی۔
اس موقع پر میر لیاقت علی نے نوجوانوں کی بھرپور شرکت کو سراہتے ہوئے کہا کہ کھیل نہ صرف دفاعی صلاحیتیں بڑھاتے ہیں بلکہ نظم و ضبط، محنت، ثابت قدمی اور کھیلوں کا جذبہ بھی پیدا کرتے ہیں۔ انہوں نے نوجوانوں پر زور دیا کہ وہ اپنی توانائیاں مثبت سرگرمیوں میں صرف کریں اور منشیات سمیت منفی رجحانات سے دور رہیں۔
انہوں نے کھیلوں کے فروغ اور بنیادی ڈھانچے کو مضبوط بنانے میں ڈپٹی کمشنر بڈگام اطہر عامر خان کی رہنمائی کو بھی سراہا۔
تقریب میں سید فرحان قریشی، پرنسپل اسپائر ورلڈ اسکول، بطور مہمانِ اعزاز شریک ہوئے، جبکہ سماجی کارکنان حفیظ اللہ میر اور مدثر احمد ملک کے علاوہ کوچز، عہدیداران اور کھلاڑیوں کے والدین بھی موجود تھے۔
