جنگ نیوز
کیف/ بھارتی نژاد ارب پتی لکشمی متل کی ملکیت والے آرسلور متل کے یوکرین کے شہر کریوی ریہ میں واقع بڑے کان کنی و فولاد کمپلیکس کو روسی میزائل حملے میں نقصان پہنچا ہے، جس کے نتیجے میں اہم توانائی تنصیبات اور بلاسٹ فرنس آپریشنز متاثر ہوئے اور پیداوار جزوی طور پر روکنا پڑی۔
یہ حملہ یوکرین کی جانب سے روس کے مختلف علاقوں پر بڑے پیمانے پر ڈرون حملوں کے بعد کیا گیا۔ روسی حکام کے مطابق یوکرینی حملوں میں کم از کم 6 افراد ہلاک ہوئے، جبکہ روسی وزارتِ دفاع نے دعویٰ کیا کہ رات بھر میں 822 یوکرینی ڈرون مار گرائے گئے۔
ماسکو کے گورنر آندرے وروبیوف کے مطابق ایک یوکرینی ڈرون کے ایک رہائشی مکان سے ٹکرانے کے نتیجے میں 83 سالہ شخص ہلاک ہوا، جبکہ پوڈولسک میں روس کی بڑی آن لائن ریٹیل کمپنی وائلڈ بیریز کے گودام میں بھی آگ بھڑک اٹھی۔
ماسکو کے میئر سرگئی سوبیانین نے کہا کہ دارالحکومت کی جانب تقریباً 600 ڈرونز کی نشاندہی کی گئی، جن میں سے تقریباً ایک تہائی کو ماسکو خطے کے اوپر تباہ کر دیا گیا۔
روس کے روستوف خطے میں بھی یوکرینی ڈرون حملے میں 5 افراد ہلاک ہوئے۔ گورنر یوری سلیوسار کے مطابق حملے میں 150 سے زائد ڈرونز شامل تھے، جن سے متعدد مکانات اور ریلوے اسٹیشن کو نقصان پہنچا اور جنگلات میں آگ بھڑک اٹھی۔
یوکرین نے رواں سال روسی سرزمین پر طویل فاصلے کے حملوں میں اضافہ کیا ہے اور ڈرونز و میزائلوں کے ذریعے فوجی صنعت، توانائی اور رسد کے مراکز کو نشانہ بنا رہا ہے۔
