سری نگر، 3 اگست:
شمالی کشمیر کے ضلع کپواڑہ کے علاقہ لولاب کے ہملی علاقے میں پیر کے روز بادل پھٹنے کے بعد آنے والے سیلابی ریلے میں ایک خاتون جاں بحق ہو گئی۔
پولیس کے مطابق متوفیہ کی شناخت نسیمہ بیگم زوجہ محمد ایوب ساکن ورنو کے طور پر ہوئی ہے۔ پولیس نے بتایا کہ بادل پھٹنے کے بعد ندی نالوں میں اچانک پانی کی سطح بڑھ گئی، جس کے بعد چلائے گئے تلاشی آپریشن کے دوران خاتون کی لاش برآمد کی گئی۔
حکام کا کہنا ہے کہ نقصان کا تخمینہ لگایا جا رہا ہے اور مزید تفصیلات کا انتظار ہے۔
دوسری جانب، جنوبی کشمیر کے ضلع اننت ناگ میں پہلگام کے علاقے بات کوٹ میں بادل پھٹنے سے ندی نالوں میں طغیانی آ گئی، جس سے مقامی لوگوں اور سیاحوں میں خوف و ہراس پھیل گیا۔ حکام نے بتایا کہ صورتحال پر نظر رکھنے اور نقصان کا جائزہ لینے کے لیے ٹیمیں روانہ کر دی گئی ہیں۔
تیز بارشوں کے باعث آمدورفت کا نظام بھی متاثر ہوا ہے۔ حکام کے مطابق عیش مقام-پہلگام سڑک لنگنائی پل کے پاس سیلابی پانی کی وجہ سے بند ہو گئی ہے۔ اس کے علاوہ، لنگنائی بات کوٹ پل کو پانی کے تیز بہاؤ کی وجہ سے نقصان پہنچا ہے۔
مقامی لوگوں اور مسافروں کو ہدایت کی گئی ہے کہ وہ صورتحال بہتر ہونے تک متاثرہ علاقوں کی طرف سفر کرنے سے گریز کریں۔
